ရှေးတုန်းက ဘုန်းကြီးတစ်ပါး တရားဟောအပြီး "ကသလာဓမ္မာ အကသလာဓမ္မာ" အစချီကာ အဘိဓမ္မာသတ်သတဲ့။
ဒါကို ရှေ့ ဆောင်ဒကာကြီးတစ်ယောက်က "ကုသလာဓမ္မာ အကုသလာဓမ္မာ" လို့သာ ကြားဖူးပါတယ်ဘုရား။ "ကသလာဓမ္မာ အကသလာဓမ္မာ" လို့ မကြားဖူးပါဘူး ဆိုပြီး လျောက်တင်လိုက်သတဲ့။ ဒါနဲ့ ဘုန်းကြီးကလဲ လာမငြင်းနဲ့၊ ကျုပ်က မနက်က သေသေချာချာ စာအုပ်ထဲမှာ ဖတ်ထားပြီးသား လို့ပြောသတဲ့။
"ဘယ်စာအုပ်လဲ ဘုရား"
စာအုပ်ယူပြီး လာပြသတဲ့။
"ဒီစာအုပ်ဘဲ"
စာအုပ်ကို သေချာကြည့်လိုက်တော့မှ တိုက်တိုက်ဆိုင်တိုင် ကကြီးအောက်က တစ်ချောင်းငင်လေးတွေကို ပိုးကိုက်စားပြတ်ထားတာတွေ့ရသတဲ့။
ဖြစ်ရလေ ဘုန်းကြီးရယ်။ ပိုးကိုက်စားထားတဲ့ စာအုပ်ကိုမှ ကြည့်ရတယ်လို့။
.................
ကျနော် မန္တလေးမှာ နေစဉ်တုန်းက အင်္ဂလိပ်စကား အရူးထပြီး နိုင်ငံခြားသားတွေကို မိတ်ဆက်၊ အလည်အပတ်ခေါ်၊ ဟိုလိုက်ပို့ ဒီလိုက်ပို့လုပ်ပေးခဲ့ဖူးပါတယ်။ အမှတ်ရစရာဖြစ်ခဲ့တာက မင်းကွန်းခရီးစဉ်မှာပါ။
ပြင်သစ်စုံတွဲတစ်တွဲကို မန္တလေးတစ်ဖက်ကမ်း မင်းကွန်းဘက် လိုက်ပို့စဉ်တုန်းကပေါ့။ အင်္ဂလိပ်စကားကလဲ Broken။ မီးနင်းကလဲ ကောင်းကောင်းမရ။ စကားလုံးကလဲ မကြွယ်ဝ။ စကားပြောချင်တာဘဲ သိတာ။ ဘာဆို ဘာမှ သိသေးတာမဟုတ်ဘူး။
တိုတိုပြောရရင်
မင်းကွန်းဘက်ကို သင်္ဘောအသေးစား (မော်တော်)လေးနှင့်ကူးဖြတ်သွားတယ်။ မင်းကွန်းဘက်ကမ်းရောက်တော့ မော်တော်ပေါ်ကဆင်းကြတယ်။ အဲဒီမှာ ပြင်သစ်မလေးက စကားတစ်ခွန်းမေးလိုက်တယ်။
"Where is toilet?"
ကျနော်ပြူးကြောင်ကြောင်နဲ့ သူတို့ကို ကြည့်လိုက်တယ်။
"Now I want to go to toilet"
ကျနော် မျက်စိလည်သွားတယ်ဗျာ။ ရှက်ရှက်နဲ့ ၀န်ခံရရင် အဲဒီ Toilet ဆိုတဲ့ မီးနင်းကို ကျနော်မသိဘူး။ တကယ့်ကို ရှက်စရာကြီးနော်။ ဒါများ နိုင်ငံခြားသားတွေကို Guide လုပ်ပေးချင်သေးတယ်တဲ့။ ရယ်စရာဘဲ။
မင်းကွန်းရွာက ကလေးတွေအကြောင်းသိတယ်မဟုတ်လား။ သင်္ဘောတစ်စီး ကမ်းဆိုက်ကပ်လာပြီဆိုရင် အပြေးအလွှားရောက်လာတတ်ကြတယ်။ ပြီးရင် မင်းကွန်းခေါင်းလောင်းတို့ ၊ မြသိန်းတန်စေတီတို့၊ မင်းကွန်းလူအိုရုံတို့၊ ပုထိုးတော်ကြီးတို့၊ ခြင်္သေ့ဖင်ပြတ်ကြီးတို့ဆီခေါ်ဆောင်သွားပြီး ကျကျနန ရှင်းပြတတ်ကြတယ်လေ။ တယ်တော်တဲ့ ကလေးတွေ။ ယောက်ျားလေးတွေရော မိန်းခလေးတွေရောဘဲ။
နိုင်ငံခြားသားဆိုရင် အင်္ဂလိပ်လိုရှင်းပြကြတယ်။ မြန်မာဆိုရင် ရွှေစကားနဲ့ပေါ့လေ။
ပြီးမှ သူတို့လက်ထဲက အမွှေးတိုင်တို့ ဖယောင်းတိုင်တို့ ပန်းတို့ကို ရောင်းချကြလေ့ရှိပါတယ်။ ချီးကျူးစရာကောင်းတို့ ကလေးလေးတွေပါ။ မင်းကွန်းသမိုင်းအကြောင်း ကြိုက်တာမေး၊ အကုန်လုံး စိတ်ရှည် လက်ရှည် ရှင်းပြကြတယ်။ ရှင်းပြရုံနဲ့တင် မုန့်ဖိုးပေးဖို့ ထိုက်တန်နေပါပြီ။ ဒါပေမဲ့ သူတို့လေးတွေ ပိုက်ဆံကို အလကားတောင်းမယူကြပါဘူး။ သူတို့လက်ထဲမှာရှိတဲ့ ဖယောင်းတိုင်၊ ပန်း၊ အမွှေးတိုင်လေးတွေကို ရိုးရိုးသားသား ရောင်းချနေကြတာပါ။
"မိဘနှစ်ပါး သေဆုံးနေတဲ့ အချိန်နှင့် ပုထိုးတော်ကြီး ပြိုကြတဲ့အချိန်တိုက်ဆိုင်ခဲ့ရင် မိဘနှစ်ပါး သေဆုံးတဲ့နေရာကို အရင်မသွားကြပါနဲ့။ ပုထိုးတော်ကြီးဆီဘဲ အရင် ပြေးသွားကြပါ။ ဒါမှ ချမ်းသာကြမှာပါ။ ဘာဖြစ်လို့လဲဆိုတော့ ပုထိုးတော်ကြီးထဲမှာ ရတနာမျိုးစုံကို ဘိုးတော်ဘုရား ဌာပနာထားခဲ့လို့ပါဘဲ"
ဒါကတော့ ကလေးလေးတစ်ယောက်က ပုထိုးတော်ကြီးအကြောင်း နိဒါန်းပျိုးလိုက်တာပါ။ ပြီးမှ တစ်ခုချင်းစီ လိုက်ရှင်းပြကြတယ်။ စိတ်ဝင်စားဖို့ အကောင်းသား။
Toilet ဆိုတဲ့စကားကို ကျနော်မသိဘဲ ကြောင်တောင်တောင်ဖြစ်နေတဲ့အခါမှာ ခုနကပြောခဲ့တဲ့ကလေးတွေထဲက ကလေးတစ်ယောက် လာရောက်ပြီး ပြောပြတယ်။
"အကိုကြီး... သူ အိမ်သာကို မေးနေတာ။ အိမ်သာဘယ်နားမှာရှိတယ်ဆိုတာ သမီးသိတယ်။ သမီးလိုက်ပို့ပေးမယ်။ လာ.. အမ (Please come with me)"
အဲဒီလိုပြောပြီး ကျနော်ခေါ်ဆောင်လာခဲ့တဲ့ ပြင်သစ်စုံတွဲနှစ်ယောက်လုံးကို အိမ်သာရှိတဲ့နေရာကို ခေါ်သွားလိုက်တယ်။ တော်ပါသေးရဲ့  ကလေးလေး ကယ်ပေလို့။ နို့မို့ရင် တကယ့်အရေးကြီးတဲ့ မီးနင်းကို မသိတဲ့အတွက် အရှက်ကွဲရချည်သေးရဲ့ ။
Toilet ဆိုတဲ့ မီးနင်းကို မသိလို့ ကျနော့်ကို အထင်တော့ မသေးလိုက်နဲ့ဦးနော်။ ကျနော်က အိမ်သာရဲ့  မီးနင်းတွေကို ကျက်မှတ်ထားပါတယ်။
ဥပမာ Latrine၊ Lavatory စသည်ပေါ့ဗျာ။ ဒါပေမဲ့ အခုဟာက တစ်ခြားစီကြီး။ ကျနော် ကျက်ထားတဲ့ အိမ်သာကိုမှ မမေးတာ။ ဘာဘဲဖြစ်ဖြစ်လေ ကျေးဇူးပါဘဲကလေးရယ်လို့ စိတ်ထဲရေရွတ်နေမိလိုက်တယ်။
အခုကျနော် လန်ဒန်ရောက်ခဲ့ပြီ။ လာခဲ့။
Toilet ဆိုတဲ့ စာလုံးမြင်လို့ကတော့ အိမ်သာမှန်းကောင်းကောင်းသိသွားပြီ။
မင်းကွန်းက ကလေးတစ်ယောက်ရဲ့ ကျေးဇူးနဲ့ပေါ့။
လန်ဒန်မြို့ လယ်ထဲကို သွားမလား။ အပေါ့အလေးစွန့်ချင်တယ်ဆိုရင် Toilet ဆိုတဲ့ စာလုံးနှင့် လမ်းညွန် Arrow လေးကိုဘဲ ကြည့်ပြီး သွားရုံပေါ့။ လွယ်လွယ်လေး။ တကယ့်ကို လွယ်လွယ်လေး။ အဟေးဟေး။ နှိပ်သဗျာ။
(Toilet နှင့် To let အမှတ် ၂ ဆက်ဖတ်ပါ)
No comments:
Post a Comment