Monday 31 January 2011

အမြင်မှန်ဖို့


အမြင်မှန်ဖို့အတွက်
အမှန်မြင်ဖို့ဘဲလိုတယ်။

ကာလာမသုတ်ကြီးကို
အပိုင်းပိုင်းမျိုချထားပြီး
ဆွံ့အတဲ့ သံစဉ်တွေ
ယိုစီးနေဦးမယ်ဆိုရင်...

သစ္စာလေးပါးလုံး
သိုမှီးသိမ်းဆည်းထားပြီး
မုသာဝါဒရေအလျဉ်နောက်
တကောက်ကောက် စီးဆင်းနေဦးမယ်ဆိုရင်...

ဓမ္မာဒါသကို
အိတ်ဆောင်နာရီလို
တစိမ့်စိမ့်ကြည့်နေပြီး
အတွေးအမြင်တွေ
ဝိုးဝါးနေဦးမယ်ဆိုရင်...

ကာလာမလက်မဲ့
သစ္စာလက်မဲ့
ဓမ္မာဒါသလက်မဲ့
သူတို့တစ်တွေအားလုံးအတွက်
ငါတို့ ဘာဆက်ပြောကြဦးမလဲ။

အမှန်ဆို
အမြင်မှန်ဖို့အတွက်
အမှန်မြင်ဖို့ဘဲလိုတယ်။

.

Wednesday 19 January 2011

လပြည့်သစ္စာ


ဘ၀မှာ...
ငါ့ကြောင့် စိတ်ဆင်းရဲရသူ
ငါ့ကို စိတ်ဆင်းရဲစေသူ
ဘယ်သူနဲ့မှ မတွေ့ရစေသား။

ဘ၀မှာ...
ငါ၏ မကောင်းမှုသည်
ငါ့အားသာ သက်ရောက်မှုရှိပါစေ
အခြားသူတို့အား သက်ရောက်မှု မရှိရစေသား။

ဘ၀မှာ...
ငါ၏ စကားတို့သည်
ပျားရည်သဖွယ်မချိုမြလင့်ကစား
ဓါးသွားလို ပြတ်ရှစေမှုမှ ကင်းစေသား။

ဘ၀မှာ..
ငါ့ကိုမြင်သောသူ
ငါကမြင်သောသူ
ဘယ်သူဖြစ်ဖြစ်
အပြစ်ကင်းသော ချစ်ခြင်းဖြင့် ရင်းနှီးကြစေသား။

ဘ၀မှာ...
ငါ၏ မျက်ရည်
ငါ့ကြောင့်ကျသည့်မျက်ရည်
ဘယ်မျက်ရည်မှ
မရှိရပါစေသား။

ဘ၀မှာ...
ငါ၏ ကာယကံ ၀စီကံ မနောကံတို့ဖြင့်
လူတကာတို့၏ မီးအမျိုးမျိုးကို
ငြိမ်းပေးရနိုင်စေသား။ ။

ဘ၀မှာ...
အကယ်၍ ငါ၏ အပြုအမူတို့သည်
စိတ်ဆင်းရဲမှုတို့ကို မွေးဖွားစေငြားအံ့
ထိုစိတ်ဆင်းရဲမှုတို့သည်
ငါ့အားသာ ဖြစ်ရပါစေသား။ ။


မာ တုမှာကံ ကမ္ပနံ ဘ၀တု

စိတ်တုန်လှုပ်မှုမှ ကင်းဝေးကြပါစေ။

.

Thursday 13 January 2011

ကိုပဲတို့ရွာ


ကျနော်တို့ တုံးဖလားရွာနှင့် အတော်လေး ဝေးကွာတဲ့ နေရာမှာ ရွာတစ်ရွာရှိတယ်။ အဲဒီရွာမှာ ပဲတွေရှိတယ်။ ပဲတွေမှ ပဲမျိုးစုံ။ မြေပဲ ဗိုလ်ပဲ ကုလားပဲ ပုဂံပဲ ထောပတ်ပဲ ပဲစောင်းလျား ပဲစင်းငုံ။ စုံလို့ စုံလို့။ အဲဒီရွာကို လူကြီးတစ်ဦးကစတင်တည်ထောင်ခဲ့ပြီး သူကိုယ်တိုင် ရွာသူကြီးအမည်ခံအုပ်ချုပ်နေလေရဲ့။ ဘယ်လို စိတ်ကူးပေါက်တယ်မသိဘူး။ အဲဒီရွာနာမည်ကို သောင်းတိုက်သွေးခြုံ လို့ အမည်ပေးထားတယ်။ တစ်ဆင့်စကားကြားရတာကတော့ သောင်းတိုက်အ၀ှန်းက လာစတည်းချကြတဲ့လူတွေအားလုံး တစ်သွေးထဲတစ်သားထဲ ခြုံထားလို့ရလောက်အောင် စည်းလုံးညီညွတ်ကြခြင်း ဆိုတဲ့ အဓိပ္ပါယ်ကို ဖော်ဆောင်တာပါတဲ့။ အတော်လေး အဓိပ္ပါယ်ရှိတဲ့ နာမည်လေးပါဘဲ။

ဒါပေမဲ့ ပေထားတဲ့နာမည်က အနွတ္ထအမည်မဟုတ်ဘဲ ရုဠှီအမည်သာဖြစ်တဲ့အတွက် သောင်းတိုက်က လာကြသူတွေအချင်းချင်း သွေးမခြုံမိဘဲ ကိုယ့်ဖာသာကိုယ်တွေးပြီး ကိုယ့်ခြုံနှင့်ကိုယ်အောင်းနေကြတဲ့အတွက် သောင်းတိုက်သွေးခြုံလို့ မခေါ်ဘဲ သောင်းတိုက်တွေးခြုံ လို့ ခေါ်ရမလောက် အချင်းချင်း အစိပ်စိပ်အမွှာမွှာဖြစ်နေကြလေရဲ့။ မြေပဲကလဲ မြေပဲမို့ ကုလားပဲကလဲ ကုလားပဲမို့ ဗိုလ်ပဲကလဲ ဗိုလ်ပဲမို့ သူ့နေရာနှင့်သူ ခပ်စွာစွာရယ်။ အခြားပဲတစ်မျိုးစိုက်တဲ့နေရာမှာ ကျန်တဲ့ပဲတွေ စိုက်လို့ မရတော့ဘူး။ စောစောအစိုက်ဦးတဲ့ပဲက အခွင့်အရေးအပြည့်အ၀ယူထားလေ့ရှိတယ်။ ဒါပေမဲ့လဲ မရှိရှိတဲ့ အကွက်လေးတွေမှာ သူ့နည်းသူ့ဟန်နဲ့ ပင်စည်တစ်ဝင့်ဝင့်ဖြစ်အောင်တော့ ကြိုးစားတတ်ကြသား။

အမှန်က အဲဒီရွာသူကြီးကိုယ်တိုင် အရှုံးခံပြီး စားပင်သောက်ပင်အမျိုးမျိုးစိုက်ခဲ့ဖူးပါတယ်။ သင်္ဘောပင် မာလကာပင် ငှက်ပျောပင် ပိန္နဲပင် စသဖြင့်ပေါ့။ ဒါပေမဲ့လဲ ကံဆိုးစွာဘဲ ဘာအပင်မှ ဖြစ်မြှောက်အောင်မြင်ခဲ့တာ မရှိခဲ့ဘူး။ ဒါကြောင့်မို့ စိုက်ပျိုးပညာရှင်တစ်ယောက်ရဲ့ အကြံပေးချက်အရ ပဲစိုက်ခြင်းလုပ်ငန်းကို သူအကောင်အထည်ဖော်ခဲ့တာပါ။ ရေမြေသဘာဝက ပဲထွက်အားကောင်းတဲ့နေရာမို့ ပဲစိုက်လုပ်ငန်း အောင်မြင်တယ်လို့ ဆိုရမှာပါ။ နှစ်စဉ် ပဲအမျိုးမျိုး တန်ချီပြီးထွက်ပါတယ်။

အဲဒီရွာထဲ ၀င်လိုက်ရင် ဟိုနားသွားလဲ ပဲ၊ ဒီနားသွားလဲ ပဲ၊ ဘယ်နေရာကြည့်ကြည့် ပဲတွေချည်း ဖြစ်နေလို့ ကျနော်တို့က ထုံးစံအတိုင်းဘဲ မူလနာမည်ကို ဖျောက်ပြီး အဲဒီရွာကို ကိုပဲတို့ရွာလို့ အမည်ပေးထားကြတယ်။ နာမည်ကဘဲ စီးသွားလို့လား၊ အနွတ္ထအမည်ကိုဘဲ ပေးမိလို့လားတော့မပြောတတ်ဘူး။ ထွက်လိုက်တဲ့ပဲ မနည်းဘူး။ ရွာနီးချုပ်စပ်ရွာတွေကတောင် မျက်စိစပါးမွေးစူးရလောက်တယ်။ အဲဒီလောက်ထိ ပဲတွေ များလွန်းတော့လဲ ကျန်တဲ့ရွာကလူတွေ သိပ်မဆက်ဆံချင်ကြတော့ဘူးပေါ့။ ရှောင်ဖယ်ဖယ်ဖြစ်နေကြတယ်။ အရေးအကြောင်း ရှိရင်တောင်မှ "ကိုပဲတို့ရွာကိုတော့ မသွားရပါရစေနဲ့ ဆားနဲ့ဘဲစားပါရစေ" ဆိုတဲ့အထိ ဖြစ်ကုန်ရော။

ပြောမယ်ဆိုလဲ ပြောချင်စရာရယ်။ လုပ်ပုံကိုလဲ ကြည့်ကြဦးလေ။ မျက်စိနောက်ချင်စရာ။ မြေပဲကလဲ သူပါမှ ဆီဖြစ်တယ်ဆိုပြီး မာနတလူလူ၊ ဗိုလ်ပဲကလဲ နာမည်နဲ့အလိုက် ခပ်ကြွားကြွား၊ ကုလားပဲကလဲ အလျော့မပေး၊ ပုဂံပဲ ထောပတ်ပဲ ပဲစောင်းလျား ပဲစင်းငုံ၊ သူတို့လဲ သူတို့ခြုံနှင့်သူတို့တော့ တံခွန်တလူလူထူပြီး မင်းမူနေကြလေရဲ့။ မျိုးတူစု ပဲအချင်းချင်းတောင်မှ အဲဒီလို ပဲအလွန်များပြီး အညွန့်တလူလူဖြစ်နေကြလေတော့ မျိုးကွဲတဲ့ တစ်ခြားစားပင်သောက်ပင် သီးနှံပင်တို့နှင့်ဆိုရင် ဘယ်လိုမှ အစေးမကပ်ကြတော့ဘူးပေါ့။

ရွာသူကြီးကလဲ ပဲဖြစ်ထွန်းလို့ ၀မ်းသာမယ်မှမကြံသေး ပဲပင်တွေရဲ့အချိုးကိုကြည့်ပြီး အတော်လေးစိတ်ညစ်နေရှာတယ်။ တစ်ခြားအပင်တွေစိုက်ခဲ့တုန်းက ဖာသိဖာသာ နေလာခဲ့ပေမဲ့ ဒီပဲပင်တွေနှင့်ကျမှ အတော်လေးဦးဏှောက်ခြောက်နေရတယ်။ ပဲပင်တွေကလဲ အပင်သန်လွန်းလေတော့ သူစိုက်ခဲ့တဲ့ပဲ သူပြန်မရှင်းနိုင်ဘဲ ဖြစ်နေတယ်။ စိုက်ပျိုးရေးပညာရှင်တစ်ယောက်ရဲ့ အကြံကို လက်ခံမိခဲ့တာကိုလဲ နောင်တရမဆုံး ဖြစ်နေရှာတယ်။ အင်း... တရားသံဝေ ပွါးလောက်ပါရဲ့။ အဲ.. ဒါပေမဲ့ ဘယ်တတ်နိုင်မလဲလေ။ သူကိုယ်တိုင်က ပဲမျိုးတွေကိုမှ ရွေးစိုက်ခဲ့မိတာကိုး။

တစ်နေ့ကျတော့ တစ်ခြားရွာက ရွာသူကြီးတစ်ယောက် သူ့လက်အောက်ငယ်သားတွေနဲ့အတူ ကိုပဲတို့ရွာကို ပေါက်ချလာတယ်။ ပဲမျိုးတောင်းဖို့လာခဲ့ကြတာပါ။ ကိုပဲတို့ရွာမှာ ပဲမျိုးဖြစ်ထွန်းတာကို သူတို့ သိထားကြတယ်လေ။ ဒါပေမဲ့ ကိုပဲတို့ရွာရောက်တဲ့အထိ သူတို့လာလမ်းတစ်လျောက် ပဲစိုက်ခင်းမပြောနဲ့၊ ဘာစိုက်ခင်းမှ မတွေ့ခဲ့ကြဘူး။ ဘာပဲပင်မှလဲ မမြင်ခဲ့ကြဘူး။ ယုတ်စွအဆုံး ကိုပဲတို့ရွာမှာ လယ်ယာမြေကွက်တွေကိုတောင် လုံးဝ မတွေ့ရဘူး။ သူတို့အတွေးပွါးကြပြီပေါ့။ သူတို့ခမျာ "ကိုပဲတို့ရွာသူကြီးစိုက်တဲ့ ပဲက ဘာပဲပါလိမ့်" ဆိုပြီး စဉ်းစားမရဖြစ်နေကြလေရဲ့။ ဒါနဲ့ မထူးပါဘူး ဆိုပြီး သူတို့ဟာ ကိုပဲတို့ရွာက သူကြီးအိမ်ကို တက်ပြီး ပဲမျိုးတောင်းကြတော့တာပေါ့။ "သင့်လျော်ရာ ပဲမျိုးကို ပေးပါ၊ ကျနော်တို့ ဖြစ်ထွန်းအောင် ကြိုးစားစိုက်ကြပါ့မယ်" လို့ ၀န်ခံကတိပေးကြတယ်။

ကိုပဲတို့ရွာသူကြီးလဲ "စိတ်ချပါ ခင်များတို့ကို ပဲမျိုးပေးပါ့မယ်။ ဒါပေမဲ့ ခင်များတို့ ကောင်းကောင်းမွန်မွန်စိုက်ပျိုးရမယ်။ အလေအလွင့် သိပ်မရှိစေနဲ့။ ဒီပဲတွေက မျိုးသန့်ပဲတွေ" ဆိုပြီး ရွာဆော်မောင်းကြီးကို ထုကာ ရွာထဲရှိလူ လေးငါးခြောက်ယောက်ကို ဆင့်ခေါ်လိုက်တယ်။ လေးငါးခြောက်ယောက်ဆို ကိုပဲတို့ရွာသားဦးရေအားလုံးကလဲ အဲလောက်ဘဲ ရှိတာကိုး။ ရွာသားတွေ စုံစုံညီညီရောက်လာတဲ့အခါ ကိုပဲတို့ရွာသူကြီးက အခြားရွာက သူကြီးနှင့်အဖွဲ့ကို ကြည့်ပြီး...

"ကဲ.. ခင်များတို့ သူတို့အားလုံးကို ခေါ်သွားပါ။ သူတို့သာ ခင်များတို့ရွာရောက်သွားရင် ခင်များတို့တစ်ရွာလုံး ပဲမျိုးစုံရဲ့ အတွေ့အကြုံကို ကောင်းကောင်းသိရပါလိမ့်မယ်။ ကျနော်အာမခံပါတယ်။ တကယ်လို့ ခင်များတို့ရွာမှာ ပဲမဖြစ်ထွန်းဘူးဆိုရင် ကျနော့်ကို ကြိုက်သလို လုပ်နိုင်ပါတယ်။ ဒါပါဘဲ။ ကဲ ခင်များတို့ သူတို့ကိုခေါ်ပြီး ပြန်နိုင်ပါပြီ"

ဆိုပြီး စကားကို တစ်လုံးချင်း ပြောချလိုက်ပါတော့တယ်။ တစ်ခြားရွာက သူကြီးလည်း "ငါတို့လာတောင်းတာက ပဲမျိုး၊ ကိုပဲတို့ရွာသူကြီးပေးခဲ့တာက လူတွေ၊ ဘယ်လို ဖြစ်တာပါလိမ့်" ဆိုပြီး ဇဝေဇ၀ါ ဖြစ်ကာ ပဲမျိုးကိုလဲ မယူ၊ လူတွေကိုလဲ ခေါ်မသွားဘဲ နောက်ကြောင်းလှည့်ပြီး ပြန်သွားကြပါတော့တယ်။ ကိုပဲတို့ရွာသူကြီးလဲ ငိုရမလို ရယ်ရမလိုနဲ့ ငုတ်တုတ်ကျန်ရစ်ခဲ့ပါတော့တယ်။ ဘယ်အချိန် ဘယ်တော့လို့ ခန့်မှန်းလို့ မရနိုင်တဲ့ ပဲမျိုးလာတောင်းမဲ့ နောက်ထပ်အဖွဲ့တစ်ဖွဲ့ကို ကိုပဲတို့ရွာသူကြီး စိတ်မောမောနဲ့ စောင့်မျှော်နေရှာလေရဲ့။ အဲ.. အဲ.. ဘယ်လိုဘဲ ဖြစ်ဖြစ် ကိုပဲတို့ရွာမှာတော့ နာမည်နဲ့အလိုက် ပဲ များနေကြဆဲပါဘဲလေ။ ။

...

Tuesday 11 January 2011

မာနခဲတို့ရွာ


ခြေတိုင်ရှည်အိမ်လေးတွေစုနေတဲ့ရွာမို့ ခြေတိုင်ရှည်ရွာလို့ဘဲ ခေါ်ကြတယ်။ ဒါပေမဲ့ အခြားရွာတွေထက် အနည်းငယ်မျှ ခြေတိုင်ပိုရှည်ပြီး ခပ်မော့မော့နေတတ်တဲ့အတွက် ကျနော်တို့က အဲဒီရွာလေးကို ထူးထူးခြားခြားအနေနဲ့ မာနခဲတို့ရွာလို့ အမည်ပေးထားကြတယ်။ ပေးမယ်ဆိုလဲ ပေးရလောက်ပါတယ်။ အိမ်လေးတွေက အခြားရွာနဲ့မတူ တမူထူးခြားပြီး ၀ံ့ဝံ့ကြွားကြွား နေတတ်ကြတာကိုး။ ခြေတိုင်ရှည်ဆိုပေမဲ့ ဖောင်ဒေးရှင်းကောင်းတဲ့ အိမ်မျိုးတော့ မဟုတ်ပါဘူး။ ခပ်ယဲ့ယဲ့ရယ်ပါ။ ဒါပေမဲ့ သိတဲ့အတိုင်းပါဘဲ။ အိမ်တွေကသာ ခပ်ယဲ့ယဲ့ရယ်။ မာနကတော့ စကြာဝတေးမင်းမာနမျိုး။

အစကတော့ ဒီမာနခဲတို့ရွာကို အိမ်တစ်လုံးထဲကစပြီး တည်ဆောက်ခဲ့တယ်လို့ သိရတယ်။ နောက်ပိုင်းမှာတော့ နှစ်အိမ်စ သုံးအိမ်စတော့ တိုးခဲ့ပါရဲ့။ ဒါပေမဲ့ သူ့အိုးနှင့်သူ့ဆန် တန်အောင်မနေတတ်ကြတော့ တစ်အိမ်ပြောင်း တစ်အိမ်ဝင်နဲ့ တစ်အိမ်ထဲ တစ်ရွာဖြစ်ခဲ့ရတဲ့ ရက်ပေါင်း မနည်းခဲ့ပေဘူး။ ကျိန်စာဘဲ မိခဲ့တာလား။ အိမ်လေးတွေကဘဲ မတည်ငြိမ်ကြတာကြောင့်လားတော့ မပြောတတ်ဘူး။ အဲဒီ မာနခဲတို့ရွာမှာ အိမ်လေးတွေ အတည်တကျမရှိခဲ့ကြဘူး။

အဲ... ဒါပေမဲ့ အခုလက်ရှိကတော့ အဲဒီရွာလေးမှာ ထူးထူးခြားခြား ခြေတိုင်ရှည်အိမ်လေး ခြောက်လုံးတိတိရှိနေကြတယ်။ ခါတိုင်း အိမ်ခြေအင်အားက ဒီလောက်ရှိခဲ့တာ မဟုတ်တော့ အံ့တော့ အံ့သြစရာရယ်။ ဒါတောင်မှ လွန်ခဲ့တဲ့ သုံးနှစ်လောက်က အိမ်ခြေ ခုနစ်လုံးတိတိရှိခဲ့တယ်ဆိုဘဲ။ ဂုဏ်ယူဝံ့ကြွားစရာဘဲပေါ့။ ဘာဖြစ်လို့လဲဆိုတော့ ဘေးပတ်ဝန်းကျင်ရွာတွေမှာ အိမ်ခြေက အလွန်ဆုံးရှိလှ လေးအိမ် ငါးအိမ်ဘဲရှိကြတာကိုး။ အခြေအနေအရ အိမ်ခုနစ်လုံးထဲက တစ်လုံးက လေးအိမ်တိုင်ရွာကို ပြောင်းသွားတဲ့အတွက် အိမ်ခြေခြောက်လုံးဘဲ ရှိတော့တာတဲ့။ ဒါတောင်မှ အနီးအနားတစ်ဝိုက်မှာ အဲဒီ မာနခဲရွာလေးက အိမ်ခြေအများဆုံးနဲ့ ပန်းပန်လျက်ပါဘဲ။

အိမ်လေးလုံးရှိတဲ့ရွာကို လေးအိမ်တန်းရွာ၊ အိမ်ငါးလုံးရှိတဲ့ရွာကို ငါးအိမ်တန်းရွာဆိုပြီး နာမည်အသီးသီးရှိကြပေမဲ့ အဲဒီအိမ်ခြေ ခြောက်လုံး ရှိတဲ့ရွာကိုတော့ ခြောက်အိမ်တန်းရွာလို့ နာမည်မတွင်ဘဲ ခြေတိုင်ရှည်ရွာလို့ဘဲ နာမည်တွင်တယ်။ ဒါပေမဲ့ အခုအချိန်မှာတော့ ခြေတိုင်ရှည်ရွာဆိုတဲ့ နာမည်ကိုတောင် လူတိုင်းမသိကြတော့ပါဘူး။ မာနခဲတို့ရွာလို့ဘဲ လူအားလုံးက သိထားကြလေရဲ့။

မာနခဲတို့ရွာလို့ ဘာကြောင့်ခေါ်သလိုဆိုတော့ ရှင်းရှင်းလေးပါဘဲ။ အဲဒီရွာသားတွေဟာ တစ်ခြားရွာသားတွေနဲ့ အပေါင်းအသင်းအဆက်အဆံမလုပ်ကြဘူး။ မာနကြီးတစ်ခွဲသားနဲ့နေကြတယ်။ မတူသလိုမတန်သလိုမျိုးပေါ့။ ပြီးတော့ အဲဒီမာနခဲတို့ ရွာသားအချင်းချင်းတောင်မှ မာနတလူလူနဲ့ နေကြလေရဲ့။ တိုင်ပင်ညှိနှိုင်းမှုမရှိကြဘူး၊ စည်းလုံးညီညွတ်မှုမရှိကြဘူး။ အပြောအဆို အဆက်အဆံလဲ မရှိကြဘူး။ အလုပ်အကိုင်လဲ ကောင်းကောင်းရှိကြတာမဟုတ်ဘူး။ ပြောရရင်တော့ ဘာမှ ဟုတ်တိပတ်တိ သူတို့မှာ လုပ်ငန်းကိုင်ငန်းရှိကြတာမဟုတ်ဘူး။ ဒါပေမဲ့ မာနကိုတော့ တစ်ပြားသားမှ မလျော့ကြဘူးဗျ။ စိတ်ဝင်စားစရာ အတော်ကောင်းတဲ့ ရွာလေးပါဘဲ။

ပတ်ဝန်းကျင်ရွာနဲ့လဲ အဆင်မပြေ ရွာသားအချင်းချင်းလဲ အဆင်မပြေဆိုတော့ တစ်ခါတစ်ခါမှာ သူတို့ကို ကြည့်ရတာ ကမ္ဘာ့အပြင်ဘက်ရောက်နေသလိုမျိုးဘဲ။ အင်း... ကမ္ဘာ့အပြင်ဘက်ရောက်နေသလိုဖြစ်နေပေမဲ့လဲ သူတို့ တံခွန်ကိုတော့ နဲနဲလေးမှ အောက်လျော့မချကြတာ ခက်သဗျား။ သေချာတွေးကြည့်ရင်တော့ ရယ်စရာကြီးဖြစ်နေတယ်။ မရှိတဲ့ဗလကို တမင်ထုတ်ပြပြီး ရင်ကော့လျောက်သလိုမျိုး၊ မထွက်တဲ့အမောက်ကို ညှစ်ထုတ်ပြီး အမောက်ထောင်ပြသလိုမျိုး၊ အတော်လေး အကြည့်ရတော့ဆိုးသား။

တစ်ခုတော့ရှိတယ်။ ရွာသားတွေက ဘာမှမယ်မယ်ရရ လုပ်တာမလုပ်တတ်ကြတာ အချင်းချင်းခြေလှမ်းကိုတော့ မြင်တတ်ကြသား။ တစ်ယောက်ယောက်က ခြေတစ်လှမ်းလှမ်းနေတာ မြင်ရင် ဒီကောင် ဟိုအချိုးချိုးနေတာ၊ ဒီကောင် ပဲများနေတာ၊ ဒီကောင် အိုက်တင်ပေးနေတာ၊ ဒီကောင် မာယာ သာဌေယျ သုံးနေတာ၊ ဒီကောင် ကလိန်ကကျစ်ကျနေတာ ဆိုပြီး တန်းသိသဗျ။ ဒါကလဲ မြွေမြွေချင်း ခြေမြင်ကြတဲ့သဘောပါ။ အမှန်မှာဆို အဲဒီ မာနခဲတို့ရွာသားတွေအားလုံး အဆံမရှိတဲ့ သင်္ကြန်သေနတ်တွေချည်းပါဘဲ။

ဖြစ်ချင်တော့ တစ်နေ့မှာ အဲဒီမာနခဲတို့ရွာလေးကို လေမုန်တိုင်းတစ်ချက်ဝင်မွှေသွားတယ်။ အင်အားအတော်ပြင်းပုံရတယ်။ အိမ်လေးတွေ ယိမ်းယိုင်နေတာကို တွေ့ရတယ်။ ယိမ်းယိုင်မှာပေါ့လေ။ နဂိုကထဲကမှ ဖောင်ဒေးရှင်းကောင်းကြတာမှ မဟုတ်တာ။ ပိုဆိုးတာက လေမုန်တိုင်းကြောင့် ရေလွှမ်းမိုးမှုပါ ခံကြရကုန်တယ်။ အခြေက မခိုင်၊ အိမ်က ယိုင်တိုင်တိုင်၊ ဆောက်ထားတာက ချောင်းနားကမ်းနားဆိုတော့ မင်းခယောက်ျား ကမ်းနားသစ်ပင်တွေလို ရွာသားတွေ ဒုက္ခရောက်ကြတာပေါ့။

ဒုက္ခရောက်ကြပေမဲ့ ဒုက္ခက မာနလောက် အားမပြင်းတော့ အချင်းချင်း အကူအညီမယူကြဘူး။ သူတို့ရှိတဲ့ အားလေးနဲ့ဘဲ ရုန်းကန်နေကြတယ်။ လွတ်မြောက်လမ်းကို ရှာဖွေနေကြတယ်။ တကိုယ်လွတ်ရုန်းချင်နေကြတယ်။ ပြေးလမ်းကောင်းကောင်းတွေ့ရင်လဲ အခြားသူတွေကို မပြကြဘူး။ ကိုယ်လွတ်ရင် ပြီးရော သဘောထားကြတယ်။ သင်ခန်းစာယူတတ်ရင်တော့ အဲဒီမာနခဲတို့ရွာလေးကို ကြည့်ပြီး သင်ခန်းစာယူလို့ ဆုံးနိုင်မှာ မဟုတ်တော့ဘူး။

တစ်ဦးကူသော်မရ တစ်သောင်းကူသော်ရ၏။ စည်းလုံးခြင်းသည် အင်အား။ ကြားဖူးခဲ့တဲ့ စကားပုံလေးတွေပါ။ အချင်းချင်းကူညီဖေးမနေကြရင်၊ အချင်းချင်းညီညွတ်နေကြရင် လူတွေလုပ်တဲ့ဘေးရန်၊ သဘာဝကပေးတဲ့ ဘေးဒဏ်တွေကို လွယ်လင့်တကူ ဖြေရှင်းနိုင်ကြမှာပါ။ အချင်းချင်း စိတ်တူကိုယ်တူရှိနေကြရင် တစ်ယောက်အားနဲ့ တစ်သောင်းအား မတူပါဘူး။ အပ်နဲ့ ထွင်းလို့ရတဲ့အရာကို ပေါက်ဆိန်နဲ့ ခွဲစရာမလိုပါဘူး။ ဒါပေမဲ့ မာနခဲတို့ရွာက ရွာသားတွေကတော့ မာနကို တပြားသားမှ မလျော့ကြပါဘူး။ ငါ့လှေငါထိုး ပဂိုး (ပဲခူး)ရောက်ရောက်၊ ငါ့မြင်းငါစိုင်း စစ်ကိုင်းရောက်ရောက် ဆိုသူတွေချည်းပါဘဲ။

အခုအချိန်မှာတော့ အဲဒီမာနခဲတို့ရွာအခြေအနေကို ဘေးပတ်ဝန်းကျင်ရွာတွေက အကဲခတ်ကြည့်နေကြလေရဲ့။ ကြည့်နေကြတာကလဲ အကူအညီပေးချင်လို့ ကြည့်နေကြတာမဟုတ်ပါဘူး။ ဒုက္ခရောက်ကြရင် လက်ခုပ်တီးဖို့ စောင့်ကြည့်နေကြတာပါ။ ဒါကလဲ သူတို့အမှားမဟုတ်ပါဘူး။ မာနခဲတို့ ရွာသားတွေကိုယ်တိုင်ကလဲ အခြားရွာသားတွေ ဒုက္ခရောက်နေတာတွေ့ရင် ၀မ်းသာမဆုံးဖြစ်ခဲ့ကြတယ်လေ။ ကဲ.. အခုတော့ အဲဒီမာနခဲတို့ရွာမှာ ကပ်ဘေးဆိုက်ရောက်နေပြီ။ လေဘေး ရေဘေးတွေပေါ့။ အဲဒီတော့... ဒီလေ ဒီရေ ဒီမိုးနဲ့ ဒီမာနခဲတို့ရွာ ဘယ်လောက် တောင့်ခံနိုင်မလဲဆိုတာ အားလုံးက စောင့်စားအကဲခတ်နေကြလေရဲ့။

အားလုံး စည်းလုံးညီညွတ်ခြင်းဖြင့် ငြိမ်းချမ်းရေး ရနိုင်ကြပါစေ။

.....