ပို့စ်မောက်ရဲ့ Spinnaker Tower (ရွက်ဖျင်မျှော်စင်ကြီး)

မနေ့တုန်းက
ကျနော်တို့သူငယ်ချင်းတစ်စု ပို့စ်မောက်ကမ်းခြေမြို့ လေးကို အလည်အပတ်သွားခဲ့ကြပါတယ်။ ကျနော့်အတွက်တော့ နှစ်ခေါက်မြောက်ပို့စ်မောက်ခရီးစဉ်လေးတစ်ခုပါ။ ပင်လယ်ပြင်ကို ဖြတ်တိုက်လာတဲ့ လေတွေကြောင့်ခိုက်ခိုက်တုန်အောင်ချမ်းအေးလှတဲ့ မြို့ လေးပါဘဲ။ ကားလေးကိုသူငယ်ချင်းတစ်ယောက်ကမောင်းတယ်။ လန်ဒန်ကနေပြီး နှစ်နာရီခန့်မောင်းရပါတယ်။
မိုးကတော့ တဖွဲဖွဲ။

မြန်မာနိုင်ငံမှာ နေစဉ်ကထဲက ပို့စ်မောက်ဘောလုံးအသင်းနာမည်နဲ့ ရင်းနှီးနေပြီး ဖြစ်တဲ့အတွက် ပို့စ်မောက်ကို သွားရတာလဲ ကြံကြံဖန်ဖန်ဂုဏ်ယူမယ်ဆို ယူလို့ရပါတယ်။ ဒါပေမဲ့ ပို့စ်မောက်ဘောလုံးကွင်းကိုတော့ မရောက်ဖူးသေးပါဘူး။ အဲဒီပို့စ်မောက်မှာ စိတ်ဝင်စားစရာအကောင်းဆုံးကတော့ Spinnaker Tower လို့ခေါ်တဲ့ ရွက်ဖျင်မျှော်စင်ကြီးပါဘဲ။ Dubai နိုင်ငံမှာရှိတဲ့ ဟိုတယ်တစ်ခုနှင့်ခပ်ဆင်ဆင် မျှော်စင်တစ်ခုပါဘဲ။
ဒါကြောင့်အဲဒီရွက်ဖျင်မျှော်စင်ကြီးအကြောင်းကို နဲနဲတင်ပြပေးပါ့မယ်။

Spinnaker Towerကို ပို့စ်မောက်ဆိပ်ကမ်း ညာဘက် အငူ သင်္ဘောဆိပ်မှာ ၂၀၀၅ အောက်တိုဘာလထဲမှာ ဖွင့်ခဲ့တာပါ။ ယူကေမှာ အမြင့်ဆုံး Tower လို့သိရပါတယ်။ အဲဒီTower အတွက် Lottery Grant အဖြစ် အစိုးရက ပေါင် ၃၈ သန်းချပေးခဲ့တာပါ။၂၀၀၀ ခုနှစ်မှာ ထောင်စုနှစ်တစ်ခုထဲ ၀င်ရောက်ခြင်းအထိမ်းအမှတ် တစ်ခုရဲ့  Idea တစ်ခုပါဘဲ။ အဲဒီ Tower အတွက် ဒီဇိုင်းသုံးမျိုး အဆိုတင်သွင်းခဲ့တာပါ။
၁။ရွက်ဖျင်ဒီဇိုင်း (Spinnaker design)
၂။ကန်တော့ပုံ ခြေသုံးချောင်းထောက်ဒီဇိုင်း (Tripod design)
၃။Towerထိပ်မှာ ဖန်လုံးကြီးတပ်ဆင်ထားမဲ့ နှစ်ဆောင်ပြိုင်မျှော်စင် (Twin tower design)

ပြပွဲတစ်ခုလုပ်ပြီး ပို့စ်မောက်မြို့ သူ မြို့ သားတွေကို မဲပေးစနစ်နဲ့ ရွေးချယ်ခိုင်းတဲ့အခါ ၆၀%ရာခိုင်နှုန်းက ရွက်ဖျင်ဒီဇိုင်း(Spinnaker design)ကိုရွေးချယ်ကြပါတယ်။ လူကြိုက်အများဆုံးဖြစ်နေတဲ့အတွက် ရွက်ဖျင်ပုံစံကိုဘဲ အတည်ပြုခဲ့ကြပါတယ်။

ဆောက်လုပ်ရေးလုပ်ငန်းကို ၂၀၀၁ နိုဝင်ဘာလအတွင် စတင်ခဲ့တာပါ။ တစ်မီတာ လုံးပတ်ရှိတဲ့ စတီးအားပြု ကွန်ကရစ်တိုင် ၈၄ချောင်း အုတ်မြစ်အတွက် စိုက်ထူခဲ့ပြီး ၂၀၀၃ခုအထိ အောက်ခြေလုပ်ငန်းကို ဆက်လုပ်ခဲ့ပါတယ်။ ၂၀၀၄မှာ မျှော်စင်ပုံစံ ရုပ်လုံးပေါ်လာခဲ့တဲ့အတွက် အားလုံးဝမ်းသားမဆုံး တပြုံးပြုံးပေါ့။ ၂၀၀၅ ဇန်န၀ါရီမှာ အီတလီအထူးအင်ဂျင်နီယာများအကူအညီနဲ့ ဓါတ်လှေခါးတပ်ဆင်ခဲ့ပြီး ၂၀၀၅ ခု အောက်တိုဘာလထဲမှာ အပြီးအစီးဖွင့်လှစ်နိုင်ခဲ့ပါတယ်။

ရာသီဥတုသာယာတဲ့နေ့တွေမှာဆိုရင် အဲဒီမျှော်စင်ပေါ်ကကြည့်ရင် ၂၃မိုင်အကွာအဝေးထိ ရှင်းလင်းပြတ်သားစွာ မြင်နိုင်တယ်လို့ဆိုပါတယ်။
အဲဒီမျှော်စင်ပေါ်ကနေပြီး ရှုခင်းကြည့်ရှုလိုသူများအတွက် နေရာအမျိုးအစားသုံးမျိုး စီစဉ်ထားပါတယ်။
၁။အမြင့်မီတာ ၁၀၀မှာ နေရာတစ်မျိုး
၂။အမြင့်မီတာ ၁၀၅မှာ နေရာတစ်မျိုး
၃။အမြင့်မီတာ ၁၁၀မှာ နေရာတစ်မျိုး

ဘယ်လိုပုံစံမျိုးနဲ့စီစဉ်ထားတယ်ဆိုတာကတော့ ကိုယ်တိုင်တက်ကြည့်မှ သိရမှာပါ။
နှစ်ခေါက်တိတိ ပို့စ်မောက်ကို ရောက်ဖူးခဲ့ပေမဲ့ မျှော်စင်အနီးတစ်ဝိုက်တင်ဘဲ ဓါတ်ပုံရိုက်ခဲ့ကြတာကလွဲလို့ ကျနော်ကတော့ မျှော်စင်ပေါ် အခုထက်ထိမတက်ဖူးသေးကြောင်းပါခင်များ။
...........................

အဲ... အဲ.. အဲ
ပြောရဦးမယ်၊ ဘယ်မြို့ ကိုဘဲသွားသွား ဗိုက်ဖြည့်ချင်ရင် အဝေးပြေးလမ်းမတွေပေါ်မှာ စားသောက်ဆိုင်တွေရှိပါတယ်။ ၀ိတ်လျော့ချင်ရင်တော့ စားသောက်ဆိုင်တစ်နေရာမှာ WC ဆိုတဲ့စာလုံးကိုမြင်ရင် အဲဒီထဲသာ ၀င်သွားပေတော့။ ဘယ်သူမှ ဆဲမလွတ်ဘူး။
ဘာဖြစ်လို့လဲဆိုတော့---
WC ဆိုတာ Water Closet (အိမ်သာ)ဆိုတဲ့ သင်္ကေတဖြစ်နေလို့ပါဘဲ။