ငါတို့ကို အသေကောင်တွေလို့မထင်လိုက်နဲ့နော်။ မင်းတို့လူသားတွေရဲ့ သတ္တိသွေးကို နှိုးဆော်ပေးဖို့ ဆောင်းကာလအလယ်မှာ အ၀တ်မ၀တ်ဘဲ စံပြအဖြစ်နဲ့နေပြနေတာ။ ငါတို့က အဲဒီလောက်ထိ သတ္တိရှိကြတယ်ဆိုတာ လူသားတွေအားလုံးကြားအောင် မောင်းခတ်ကြေငြာလိုက်ပါ။................................
ဆောင်းဦးပေါက် ရောက်ခါစရှိသေး။ လူသားတွေ ရယ်စရာကောင်းလိုက်တာနော်။ ခန္ဓာကိုယ်ကို ထုပ်ပိုးထားတဲ့ အ၀တ်တွေကလဲ ဘယ်နှစ်ထပ်တောင်များလဲမသိဘူး။ ခြေအိတ်လက်အိတ် ခေါင်းစွပ် အနွေးထည် စုံနေတာဘဲ။
အဲဒါ အသိဥာဏ်ရှိလှပါတယ်ဆိုတဲ့လူသားတွေလေ။ သူတို့ ကိုကြည့်ရတာ စိတ်အိုက်လိုက်တာ။ အရှက်လုံရုံခပ်ပါးပါးလေးဝတ်ပြီး ငါတို့လို သတ္တိရှိရှိနေပြလိုက်ပါလား။
အသိဥာဏ်ရှိတယ်လဲပြောသေး။ ရာသီဥတုကို ပြောင်းလဲပစ်ဖို့တော့ သူတို့မတတ်နိုင်ကြဘူးမဟုတ်လား။ စကားကြီးစကားကျယ်သုံးပြီး အိုဇုန်းလွှာကို တက်ဖာမတဲ့။ ကမ္ဘာကြီးပူနွေးလာတာကို ကာကွယ်ကြမယ်တဲ့။
သဘာဝသစ်တောတွေကို ထိန်းသိမ်းမယ်တဲ့။ သဘာဝရေအရင်းမြစ်တွေကို အရှိအတိုင်းထားမယ်တဲ့။ လေကတော့ နဲနဲလေးမှ မလျော့တဲ့လူတွေ။
ဘာမှမလုပ်တတ်ကြတဲ့လူပိုတွေ။ မိုးရွာရင်ထီးဆောင်းမယ်။ နေပူရင် နေချိုးမယ်။ နှင်းကျရင်အလှကြည့်မယ်။ ဒါလောက်ဘဲသိတဲ့လူတွေ။ တစ်ခုရှိသေးတယ်။ သူတို့ရဲ့ လမ်းပေါ်မှာမိုးနေတဲ့ ငါတို့ကို တစ်ခါတစ်ခါ လွှနှင့်လာဖြတ်ကြသေးတယ်။ ကြွက်မနိုင် ကျီမီးရှို့ တဲ့သူတွေ။ ငါ အော်ပြီးရယ်ပစ်လိုက်ချင်တယ်။
ငါတို့အရွက်တွေ ဝေနေတဲ့အခါဆိုရင်တော့ လာလာပြီး အပင်အောက်မှာ ကြည်နူးနေလိုက်ကြတာ။ ငါတို့ အရွက်တွေကြွေချိန်ကျတော့ အမှုိုက်တွေကို ထုတ်လုပ်တဲ့အကောင်တွေဆိုပြီး အနားမကပ်ပြန်ကြတော့ဘူး။ သူတို့လောကကြီးလှပဖို့ ငါတို့ကိုတာဝန်ပေးထားတာကျနေတာဘဲ။ လုပ်ချင်တိုင်းလုပ်နေကြတာ။
လာမစမ်းနဲ့နော်။ ဘာမှတ်နေလို့လဲ။ မိုက်ရူးရဲလို့ဘဲပြောပြော။ သတ္တိကောင်းလိုက်တာလို့ဘဲဆိုဆို။ ဆောင်းအလယ်ကြီးမှာ ငါတို့လို အ၀တ်မ၀တ်ဘဲ ဘယ်သူနေနိုင်လဲ။ လာခဲ့လေ။ တစ်ညလောက် ငါတို့လိုနေကြည့်ပါလား။ မနက်မိုးလင်းရင် ငါမြင်ယောင်မိသေးတယ်။ ရေခဲတုံးလူသားဘ၀နဲ့ တောင့်တောင့်ကြီး။ ငါတို့က လေးငါးခြောက်လကြီးတောင် အ၀တ်မ၀တ်ဘဲ ဆောင်းအေးအေးဒဏ်ကို ကြံ့ ကြံ့ ခံနိုင်တယ်နော။
မင်းတို့ရဲ့ ဘ၀လှပဖို့ ငါတို့အများကြီးဖြည့်စွမ်းပေးခဲ့တယ်ဆိုတာ မမေ့ ပါနဲ့။ မင်းတို့ ရဲ့ စက်အမျိုးမျိုး ယာဉ်အမျိုးမျိုးက ထုတ်လွတ်တဲ့ လေထုညစ်ညမ်းမှုကို ငါတို့ အမြန်စုပ်ယူထားလို့ မင်းတို့ သက်သာတယ်မှတ်။
မဟုတ်ရင် မင်းတို့ ခန္ဓာကိုယ်မှာ ရောဂါပေါင်းစုံဝင်နေတာကြာပြီ။
တစ်ချို့ ငါတို့အမျိုးတွေရဲ့ သားသမီး ဆွေမျိုးတွေကို မင်းတို့က သက်သတ်လွတ်ဆိုပြီး စားကြပြန်ရော။ တော်တော်ရက်စက်တဲ့လူတွေ။ သူတို့အသားကျတော့ ခြင်ကောင်လေးကိုက်တာကစပြီး သည်းမခံနိုင်ဘူး။
အတ္တအရမ်းကြီးကြတယ်။
ဟိုတနေ့က
သူတို့ရဲ့ အိမ်ပြတင်းပေါက် ပွင့်နေလို့ ငါလှမ်းပြီးအိမ်ထဲကြည့်လိုက်မိတယ်။
ဟိုက်ရှားဘား....
သူတို့မှာ အအေးဒဏ်ကိုကာကွယ်ဖို့ စောင်ကြီးတွေ မွေ့ယာကြီးတွေရှိတယ်။
အပူပေးစက်ရှိတယ်။ ၀ိုင်အမျိုးမျိုးရှိတယ်။ ကော်ဖီရှိတယ်။ တီးရှိတယ်။
ရေပူရေအေးစက်တောင်တပ်ဆင်ထားလိုက်ကြသေးတယ်။
မတရားလိုက်တာနော်။ အတော်ဇိမ်ခံကြတဲ့လူတွေ။
ဒါပေမဲ့လဲလေ
ငါတို့ကတော့ မင်းတို့ပျော်ရွှင်နေတာကိုကြည့်ပြီး ပျော်ရွှင်နေမှာပါ။ ချမ်းအေးလှတဲ့ဆောင်းကာလမှာ မင်းတို့တစ်တွေ အရမ်းအချမ်းဒဏ်ကိုကြောက်လန့်နေမှာ စိုးရိမ်လို့ ငါတို့အားလုံး စံပြအနေနဲ့ အ၀တ်မ၀တ်ဘဲ မားမားမတ်မတ် မင်းတို့ရှေ့ က ရပ်တည်ပေးနေမှာပါ။ လာခဲ့စမ်း။ ဆောင်းရဲ့ အအေး။ ဆောင်းရဲ့ အချမ်း။ ပျင်းတောင်ပျင်းသေးတယ်။
နှင်းခဲတွေ ဘယ်လောက်ဘဲ ထူပါစေ။ ငါတို့နဲ့တွေ့ရင် ဖြေဆည်ရာမရဘဲ အရည်ဘ၀ကို ပြောင်းသွားစေရပါမယ်။ လူသားတွေ ငါတို့ကို ရက်စက်ပေမဲ့ ငါတို့ကတော့ မေတ္တာမပျက် လူသားတွေအတွက် ကောင်းကျိုးတွေကိုဘဲ ဆက်လက်သယ်ပိုးပေးနေဦးမှာပါလေ။ ။
No comments:
Post a Comment