မသိဘဲနဲ့ သိချင်ယောင်ဆောင်တာက ပိုပြီးခက် (၂)

မသိဘဲနဲ့သိချင်ယောင်ဆောင်တဲ့သူတွေအကြောင်းရေးရရင်တော့ အာကာကို လွှာပုံပြု မေရုကိုစုတ်တံချီ ပင်လယ်ရေ မှင်လုပ်လို့ ရေးရင်တောင်မှ ကုန်နိုင်အံ့မထင်ပါဘူး။ ဒါပေမဲ့ နောက်ထပ်အဖြစ်အပျက်တစ်ခုရေးပြပါဦးမယ်။

ဒုတိယအဖြစ်အပျက်။
ဒီအဖြစ်အပျက်က ကျနော်ကိုယ်ဖြစ်ပျက်ခဲ့တာ မဟုတ်ပါဘူး။ ကျနော့်သူငယ်ချင်းတစ်ယောက်ပါ။ ခက်တာက သူနှင့်အတူ ကျနော်လဲ အဲဒီအဖြစ်အပျက်ထဲမှာပါဝင်ခဲ့တယ်။ ပြောရမှာတော့ ခပ်ရှက်ရှက်ဘဲဗျာ။ ကိုယ်အခဲ့တဲ့အကြောင်း သူများတွေကို Websites ပေါ်မှာ မောင်းခတ်ကြေငြာသလိုဖြစ်နေပြီ။

လွန်ခဲ့တဲ့ လေးငါးနှစ်တုန်းကပါ။ ကျနော်တို့ စင်္ကာပူကို အလည်အပတ်သွားကြတယ်။ Mai လေယာဉ်ပျံကြီးကိုစီးလို့ပေါ့ဗျာ။
လေယာဉ်ပေါ်မှာ ကျနော့်ရဲ့ ဝါသနာအတိုင်း စပ်စုတော့တာပါဘဲ။ နေရာအထူးအဆန်းရောက်တိုင်း အိမ်သာတက်ကြည့်ချင်တဲ့ဆန္ဒကတားလို့မရဘူး။ ဒါကြောင့်အိမ်သာသွားတယ်။ ကိစ္စပြီးတဲ့အခါ ရေဆွဲချလိုက်တယ်။ ကျနော်လဲ ရေဆွဲချလိုက်ရော ဝေါ ကနဲ ရေတွေပန်းထွက်တာနဲ့တပြိုင်နက် လေယာဉ်ကြီးကလဲ အောက်ကို တစ်ဆင့် ဂျိတ် ကနဲ ပြုတ်ကျသွားတယ်။

ကျနော်ကတော့ ငါလုပ်တာမှားလို့ လေယာဉ်ကြီးပျက်ကြတော့မယ်ထင်တာပေါ့ဗျာ။ အိမ်သာထဲက ဘယ်မှမထွက်ရဲတော့ဘူး မျက်စိမှိတ် နှားပိတ်ပြီး ထိုင်ချနေလိုက်ရတယ်။ နောက်မှသိရတာက စင်္ကာပူလေဆိပ်ရောက်ခါနီးလို့ ကွင်းဆင်းဖို့ပြင်ဆင်တာပါတဲ့။ တိုက်ဘဲ တိုက်ဆိုင်နိုင်လွန်းတယ်။

ကျနော်လဲ အိမ်သာကအပြန် ကျနော့်သူငယ်ချင်းတစ်ယောက်က "အပေါ့သွားချင်တယ်၊ လေဆိပ်ဆင်းကာနီးသွားလို့ ရဦးမလားမသိဘူး" လို့ မေးတယ်။ ကျနော်လဲ "ဟာ..ဘာလို့မရရမှာလဲ သူတို့မှာ နည်းစနစ်တွေရှိတာဘဲ... အပေါ့တွေမြို့ ပေါ်မကျနိုင်ပါဘူး" ဆိုပြီး ဆရာလုပ်လိုက်တယ်။ သူလဲ တကယ်အပေါ့စွန့်ချင်နေပုံရပါတယ်။ အောင့်ထားရလို့ မျက်နှာကြီးတောင် နီသလိုဖြစ်နေပြီ။

ကျနော်ပြောအပြီးမှာ သူအိမ်သာကိုသွားတယ်။ ခဏနေတော့ပြန်လာတယ်။ ကျနော်က "အဆင်ပြေခဲ့တယ်မဟုတ်လား"လို့ မေးကြည့်လိုက်တော့ "ရှူးရှူးမပေါက်ခဲ့ရဘူး။ လေယာဉ်မယ်တွေက ငါ့ကိုအိမ်သာထဲဝင်ခွင့်မပေးတော့ဘူး။ ကွင်းဆင်းဖို့နီးလာလို့တဲ့" အဲဒီလိုပြောပြီး မျက်နှာနီနီကြီးနဲ့ဘဲ ဆက်လက်အောင့်အီးသည်းခံနေတာကိုတွေ့ရတယ်။ အော်.. ဒါလဲ ဒုက္ခတစ်မျိုးဘဲနော်။

ဒါတွေက ကျနော်ပြောပြဖို့ရည်ရွယ်ထားတဲ့ကိစ္စ မဟုတ်ပါဘူး။ စပ်မိလို့ပြောပြတာပါ။ မိတ်ဆွေတို့လဲ လေယာဉ်ပေါ်မှာ အပေါ့သွားချင်ရင် လေဆိပ်နားရောက်ခါနီးထိစောင့်မနေကြဖို့စေတနာနဲ့ပါ။
ကျနော်ပြောပြမဲ့ မသိဘဲနဲ့ သိချင်ယောင်ဆောင်တာက ပိုခက် ဆိုတာက စကာင်္ပူရောက်ပြီး နှစ်ရက်မြောက်မှာ ကျနော်တို့ထက် အရင် စင်္ကာပူကိုရောက်နေတဲ့ သူငယ်ချင်းတစ်ယောက်နှင့် အတူလျောက်လည်ကြရင်းကြုံခဲ့ရတဲ့ အဖြစ်အပျက်ကလေးပါ။

သူက စင်္ကာပူကို နှစ်ခေါက်သုံးခေါက်လောက်ရောက်ပြီးသားသူဆိုတော့ ကျနော်တို့ရဲ့ ဆရာကြီးပေါ့ဗျာ။ သူနှင့်အတူလျောက်လည်ကြတယ်။ MRT တွေစီးတယ်။ ဘတ်စ်ကားတွေစီးတယ်။ လမ်းလျောက်တယ်။ သူကသွားမယ်ဆို ကျနော်တို့က Ready ဘဲလေ။ မှတ်တိုင်လွန်သွားလို့ ပြန်ပြန်ပြီးစီးလာရတဲ့အခါလဲရှိတယ်။ မှတ်တိုင်ရောက်ပြီးကားထွက်ခါနီးမှ ဒီမှတ်တိုင်မှာဘဲဆင်းရမယ်ဆိုပြီး ဘတ်စ်ကားပေါ်ကလဲ ခုန်ချခဲ့ဖူးတယ်။

တစ်ရက်မှာ
သူက City Hall နှင့် Peninular ကုန်တိုက်ကိုလိုက်ပို့ပေးမယ် လို့ပြောတယ်။ ကျနော်တို့လဲ သွားကြမယ်ပေါ့ဗျာ။
MRT ပေါ်ကဆင်းပြီး လမ်းပျောက်နေလို့ ကျနော်တောင် နိုင်ငံခြားသားတစ်ယောက်ကို လမ်းမေးလိုက်ရသေးတယ်။ ဆရာကြီးကတော့ သိသလိုလိုနဲ့ ဟိုတစ်ခါလာတုန်းက ဒီလမ်းကနေ ဘယ်ကို သွားရင် စီးတီးဟောရောက်ပါတယ် ဘာညာ ဆိုပြီး ဆင်ခြေတွေပေးနေလေရဲ့ ။
နိုင်ငံခြားသားတစ်ယောက်ရဲ့ လမ်းညွန်မှုအတိုင်း ဆက်လျောက်သွားလိုက်တော့ စီးတီးဟောကို တန်းရောက်သွားပါတယ်။

စီးတီးဟောက ကုန်တိုက်ကြီးဆိုတော့ စက်လှေခါးတွေက အများသား။ တစ်နေရာအရောက်။ အပေါ်ထပ်ကိုတက်ဖို့ စက်လှေခါးလိုက်ရှာကြတယ်။ လိုက်ရှာရင်းနဲ့ဘဲ စက်လှေခါးတစ်စင်းတွေ့ရတယ်။ ဒါပေမဲ့ စက်လှေခါးက လည်ပတ်မနေဘူး။ စက်ရပ်နေတယ်။

ဟော.. တွေ့ပြီ.. သူပဲ သူပဲ ဆိုပြီး ကျနော့်သူငယ်ချင်းက ဒီစက်လှေခါးကြီးကပျက်နေတယ် ။ လာကွာ ။ ဒီစက်လှေခါးပေါ်ကဘဲ မြန်မာ့နည်းမြန်မာ့ဟန်နှင့်ခြေနှင်းပြီး တက်ကြရအောင် လို့ပြောပြီး ဆရာကြီးစတိုင်ဖမ်းကာ မသိဘဲနဲ့ သိချင်ယောင်ဆောင်ပြောလိုက်တယ်။ ပြောပြီးပြီးချင်းဘဲ စက်ရပ်နေတဲ့ စက်လှေခါးပေါ် သူအရင်တက်သွားတယ်။ သူလဲ စက်လှေခါးပေါ်အတက် ဘယ်ပြောကောင်းမလဲ စက်လှေခါးကြီးက စတင်လည်ပတ်တော့တာပါဘဲ။ Auto စနစ်နဲ့ လူထိမှ စက်သွားအောင်လုပ်ထားတာကိုး။ ဒါပေမဲ့.. စက်လှေခါးကြီးလည်ပတ်တာက အောက်ကိုဆင်းဖို့ လည်ပတ်နေတာ။ ကျနော်တို့သွားချင်တာက အပေါ်ထပ်ကို။

ကျနော်တို့ကတော့ ရပ်ပြီးသူ့အခြေအနေကို အကဲခတ်နေကြတယ်။ စက်လှေခါးက သိပ်အရှည်ကြီးမဟုတ်ဘူး။ လှေခါးထစ်နှစ်ဆယ်ကျော်ကျော်လောက်ဘဲရှိမယ်။ စက်လှေခါးကြီးက အောက်ဘက်ကိုလည်ပတ်လိုက် ကျနော်တို့သူငယ်ချင်း(ဆရာကြီး)ကလဲ အပေါ်အမြန်ရောက်အောင်ပြေးတက်လိုက်နဲ့ ကြည့်ရတာ အတော်လေးရုပ်ဆိုးသဗျာ။ ကျနော်တို့ကိုလဲ လူတတ်ကြီးလုပ်ပြီး ဟေ့ကောင်တွေ လာကြလေကွာ လို့ သေဖော်ညှိတယ်။ကျနော်တို့ကတော့ သူ့နောက်လိုက်မသွားကြပါဘူး။

သူလဲ အပေါ်ထပ်မရောက်လိုက်ပါဘူး။ စက်လှေခါးလုံခြုံရေးတွေရောက်လာတယ်။

"ဟေ့ လူ ဒါအဆင်းလှေခါးဗျ။ ဘာဖြစ်လို့တက်ဖို့ကြိုးစားနေရတာလဲ ဆင်းခဲ့"

"ဟုတ်ကဲ့... ဆောရီး ဆောရီး"

ဆောရီးဆိုတဲ့စကားကို လေးငါးခါဆင့်ပြောပြီး စက်လှေခါးတစ်ဝက်လောက်က လွှားကနဲ အောက်ကိုခုန်ချလိုက်တယ်။ အောက်ရောက်တော့ မချော်လဲရုံတမယ်ပါဘဲ။ သူ့ခန္ဓာကိုယ်ပေါ်မှာလဲ ချွေးတွေ ရွှဲရွှဲစိုလို့။

ကျနော်တို့လဲ သူ့ပုံစံကြီးကို ကြည့်ပြီး မရယ်ဘဲမနေနိုင်ကြတော့ဘူး။ အဲဒီ လုံခြုံရေးတွေ
ရှိနေတာကို ဂရုမစိုက်နိုင်တော့ဘဲ ဗိုက်နှိပ်ပြီး အသားကုန် ခွက်ထိုးခွက်လှန် အားရပါးရ ရယ်မောပစ်လိုက်ကြတယ်။

အဲဒီကုန်တိုက်က အထွက်မှာ သူပြောတာက
"တော်သေးတယ်ကွာ။ ဒဏ်ရိုက်ခံရရင် ပိုက်ဆံတွေအများကြီးပေးရမှာသေချာတယ်။ ဒါကြောင့် ငါ အမြန်ခုန်ချလိုက်တာ။ မင်းတို့က ဘာလို့ ဒီလောက်တောင်ရယ်နေကြရတာလဲ။ မင်းတို့နဲ့ခရီးအတူသွားရတာ မနှိပ်ပါဘူးကွာ" တဲ့။

ကျနော်တို့က သူ့ကိုပြောလိုက်တယ်။
"ခံလိုက်ပေါ့ကွ။ မသိဘဲနဲ့ သိချင်ယောင်ဆောင်ပြီး ဆရာကြီးစတိုင်လုပ်တာ" လို့။
ဒါပေမဲ့ ပါးစပ်ကပြောလိုက်တာမဟုတ်ပါဘူး။ စိတ်ထဲကပြောလိုက်ကြခြင်းရယ်ပါ။

မသိတာကို သိသလိုလုပ်ပြီး မသိသေးတဲ့ကိစ္စတွေမှာ ၀င်လုပ်မိရင် အရုပ်ကြိုးပြတ် အရှက်ရတတ်တာကို သင်ခန်းစာယူတတ်ဖို့တင်ပြလိုက်ခြင်းပါ။

ဆက်လက်ဖော်ပြပါဦးမယ်။