ကျနော်တို့ရွာရဲ့ အရှေ့ ဘက် ၆ဖာလုံလောက်အကွာမှာ သာယာကုန်းရွာရှိတယ်။ တောင်ဘက်တစ်မိုင်လောက်အကွာမှာတော့ ပေကုန်းဆိုတဲ့ ရွာကြီးရှိတယ်။ ပေကုန်းရွာကြားနှင့်ကျနော်တို့ရွာကြားထဲမှာ ကတ္တရာကားလမ်းရှိတယ်။ အဲဒီကတ္တရာကားလမ်းနှင့်ကျနော်တို့ရွာကြားထဲမှာ ကျနော်တို့ရွာရဲ့ သုဿာန်ရှိတယ်။
သုဿာန်ဟာ သုဿာန်နှင့်မတူပါဘူး။ တကယ့်သစ်တောအုပ်ကြီးနှင့်ဘဲတူပါတယ်။ သစ်ပင်ဝါးပင်တွေနှင့်အုပ်ဆိုင်းနေလေရဲ့ ။
အသက်အန္တရာယ်ကင်းတဲ့နေရာကို သတ္တ၀ါတွေရွေးချယ်တတ်ကြတာ သဘာဝပါဘဲ။ ကျေးငှက်သာရကာကအစ ကျွဲနွားအဆုံး အဲဒီသုဿာန်ထဲမှာဘဲ ကျက်စားကျင်လည်လေ့ရှိကြတယ်။ ဘယ်လောက်ထိတောထူသလဲဆိုတာမေးမနေနဲ့။ တောကြက်တွေညအိပ်တန်းဝင်လို့ရတဲ့အထိ တောအုပ်ကထူထဲနက်နဲတယ်။ သုဿာန်ဆိုပေမဲ့ နှစ်အတော်ကြာတဲ့အထိ အသေအပျောက်မရှိကြလေတော့ သုဿာန်နှင့်မတူပါဘူး။ သဘာဝတောအုပ်တစ်ခုနှင့်သာ တူနေပါတော့တယ်။
ကျနော်တို့ရွာက ကျွဲနွားတွေဟာ အစာစားပြီးရင် အိမ်ကိုသူတို့ဖာသာ ပြန်လာလေ့ရှိတယ်။
အိမ်ကို မရောက်လာလို့ရှိရင် သုဿာန်ထဲသာသွားကြည့် ကျိန်းသေပေါက်ဘဲ။ အဲဒီလောက်ထိ တိရစ္ဆာန်တွေက သုဿာန်ကိုကြိုက်ကြတာ။
ကျွဲနွားတိရစ္ဆာန်တွေနှင့်ကျေးငှက်သာရကာတွေဆုံဆည်းနေကြနေရာဖြစ်တဲ့အတွက် အချင်းချင်းကြောက်လန့်မှု မရှိကြတော့ပါဘူး။ ကျွဲနွားခလောက်သံကြားရင်လဲ ကျေးငှက်သာရကာတွေ လန့်မပျံကြတော့ပါဘူး။
ဒီအခွင့်အရေးကိုယူပြီး ညဘက်တွေမှာ လူတစ်ချို့ က ကျွဲနွားယောင်ဆောင်ကာ ခလောက်ကိုလည်ပင်းမှာဆွဲပြီး သုဿာန်ထဲဝင်လေ့ရှိတယ်။ တောကြက်ပစ်ဖို့ပါ။ တောအခေါ် တူမီးသေနတ်ကို ယမ်းထည့် ကျည်ဆံထည့်ပြီး တောကြက်ပစ်ဖို့ အဆင်သင့်ဘဲ။
တောကြက်တွေဟာ အိပ်တန်းဝင်ရင် အုပ်စုလိုက် မိသားစုလိုက် ၀င်လေ့ရှိကြပါတယ်။ ဒါကိုအခွင့်ကောင်းယူပြီး သုဿာန်ထဲမှာရှိတဲ့ တောကြက်တွေကို တူမီးသေနတ်နှင့်ပစ်ခတ်စားသောက်ကြတဲ့သူတွေမနည်းပါဘူး။ တစ္ဆေမကြောက်တတ်တဲ့သူတွေ တောကြက်သားစားရတာပေါ့လေ။
တစ်နေ့။
ညတစ်ညမှာ ဦးတောက်ထိန်အိမ်က ကျွဲတွေအိမ်ပြန်မရောက်လာကြဘူး။ ဦးတောက်ထိန်ကိုယ်တိုင် သုဿာန်ထဲကို ညကိုးနာရီလောက်တစ်ယောက်ထဲသွားတယ်။
သူ့ရဲ့ ကျွဲတွေ သုဿာန်ထဲ ရှိမရှိသိရအောင်ပေါ့။
ဦးတောက်ထိန်က တစ္ဆေသရဲလုံးဝမယုံကြည်ဘူး။ ပြီးတော့ လုံးဝလဲ မကြောက်တတ်ဘူး။ ညမှောင်မှောင်ကြီးထဲ ကျွဲနွားကြည့်ဖို့ သုဿာန်ထဲ တစ်ယောက်ထဲ သွားတဲ့အခါပေါင်းလဲ မနည်းတော့ဘူး။
သူ့ကျွဲတွေ သုဿာန်ထဲမှာ တွေ့ရတဲ့အတွက် စိတ်ချလက်ချ အိမ်ပြန်လာခဲ့တယ်။ သုဿာန်ကစထွက်ကထဲက ပြဿနာက စပြီ။ သူ့နောက်က တစ်ယောက်ယောက်လိုက်လာသလို ခံစားရတယ်။
ခြေသံဘဲကြားရတယ်။ လှည့်ကြည့်လိုက်ရင် ဘာမှမတွေ့ရဘူး။ သူလုံးဝ မကြောက်ပါဘူး။
သတ္တိရှိရင်ထွက်ခဲ့ နပန်းလုံးမယ်ဆိုတဲ့လူစားမျိုးကိုး။
ဒါပေမဲ့
သူကသွားရင် နောက်ကခြေသံကလဲ သွားနေတယ်။ သူရပ်လိုက်ရင် နောက်ကခြေသံကလဲ ရပ်နေတယ်။
ကြာလာတော့ ကြက်သီးမွေးညှင်းတွေထလာတယ်။ ရေငတ်လာသလိုခံစားရတယ်။ ပြေးထွက်ချင်စိတ်တွေပေါက်လာတယ်။ ကြောက်စိတ်တွေ ၀င်လာတယ်။
သူ့ရဲ့ ဘ၀မှာ ပထမဦးဆုံး ကြောက်စိတ်ဝင်ခြင်းပါဘဲ။ ဒီလိုနဲ့ဘဲ ရွာထိပ်ကို ရောက်လာတယ်။
သူ့ရဲ့ အိမ်က ရွာရှေ့ ပိုင်းမှာပါ။ သူ့အိမ်ရှေ့ မှာ လမ်းဘဲရှိပါတယ်။
လမ်းရဲ့ ရှေ့ မှာတော့ လယ်ကွက်တွေပါဘဲ။ သုဿာန်ဘက်က လာတဲ့လမ်းက
သူ့အိမ်အရှေ့ တည့်တည့်ကို ရောက်တယ်။
သူ့ရဲ့ အိမ်ဝင်းကို သစ်တုံးတွေကို ဂွနှင့်ခံထားပြီး ခြံစည်းရိုးလုပ်ထားတယ်။ သူ့ရဲ့ အိမ်ကို ၀င်ချင်ရင် နှစ်အိမ်လောက်ကို ကျော်ပြီးမှ လမ်းအတိုင်းကွေ့ဝင်ရလေ့ရှိပါတယ်။ ဒါပေမဲ့ အရင်စလို ကိစ္စတွေရှိလာရင်တော့ အိမ်ကို ကာရံထားတဲ့ တုံးတင်တွေအောက်ကနေပြီး လျိုးဝင်လေ့ရှိပါတယ်။
အခုလဲ
ဦးတောက်ထိန်တစ်ယောက် မကြောက်စဖူး သရဲအရမ်းကြောက်လာတဲ့အတွက် လမ်းအတိုင်း ကွေ့မနေတော့ဘဲ
သူ့အိမ်ကို ပြန်ချင်ဇောနဲ့ သူ့အိမ်ဝင်းကို ကာရံထားတဲ့ တုံးတင်တွေအောက်ကနေ ခါးကုံးပြီး လျှိုးဝင်လိုက်တယ်။
အဲဒီလို လျှိုးဝင်ဝင်ချင်းဘဲ နောက်ကနေပြီး တစ်စုံတစ်ယောက်က ဖြန်းကနဲ အသံမြည်အောင် လက်ဝါးစောင်းနှင့် သူ့ခါးအလယ်တည့်တည့်ကို ရိုက်ထည့်လိုက်တယ်။ သူ့ရဲ့ ခါး အရမ်းနာကျင်သွားတယ်။
နာကျင်မှာပေါ့ (သူ့အပြောအရ) သရဲရိုက်လိုက်တာကိုး။
အဲဒီနေ့ကစပြီး ဦးတောက်ထိန်တစ်ယောက် အပြင်းဖျား ဖျားပြီး ခါးနာတဲ့ ဝေဒနာကိုလဲ သုံးလကျော်လောက် ခံစားလိုက်ရတယ်။ တစ္ဆေသရဲဆိုရင်လဲ ကြောက်မှကြောက်ဘဲ။ ညနေပိုင်းဆိုရင် သုဿာန်ကိုမပြောနဲ့ ဘယ်နေရာကိုမှ မသွားရဲတော့ဘူး။
အခုဆိုရင် ဦးတောက်ထိန်တစ်ယောက် လူ့လောကမှာ မရှိတော့ပါဘူး။ သေဆုံးသွားရှာပါပြီ။ သရဲအခြောက်ခံရလို့ သေဆုံးသွားတာမဟုတ်ပါဘူး။ လူကြီးရောဂါနဲ့ဘဲ ဆုံးသွားတာပါ။
သူသေသွားပေမဲ့ သင်ခန်းစာ တစ်ပုဒ်တော့ ကောင်းကောင်းရလိုက်ပါတယ်။
(တစ္ဆေသရဲလုံးဝ ယုံကြည်မှုမရှိလို့ ) တစ္ဆေသရဲလုံးဝမကြောက်တတ်တဲ့သူတောင်မှ
နောက်ဆုံးတော့ ကြောက်ရတာဘဲဆိုတဲ့ သင်ခန်းစာပါ။
နာနာဘာဝတွေဟာ သူတို့ကို မကြောက်တတ်တဲ့သူတွေ ပညာပေးတတ်ကြတယ်ထင်ပါရဲ့ ။
ဒီလိုအဖြစ်အပျက်တွေအများကြီး ကြားရဖန်များလာတော့လဲ ကျနော်ကိုယ်တိုင်တောင် တစ္ဆေသရဲကို ယုံကြည်ချင်လာသလိုလိုဖြစ်မိတာကတော့ အမှန်ပါဘဲ။
No comments:
Post a Comment