မရှိတာထက် မသိတာခက်
မသိတာထက် မသိချင်ယောင်ဆောင်တာက ပိုခက်။
အဲဒီစကားလေးတွေဟာ မှန်ကန်ပေမဲ့ မသိချင်ယောက်ဆောင်တာထက် သိချင်ယောင်ဆောင်တာက ပိုပြီးခက်ပါတယ်။ သိတာကို မသိချင်ယောင်ဆောင်တာ ပြဿနာသိပ်မရှိဘူး။
မသိဘဲနဲ့ သိချင်ယောင်ဆောင်ရင်တော့ လူပုံအလယ် အရှက်ကွဲတတ်တယ်။ ကျနော်ကိုယ်တိုင် ကြုံဖူးခဲ့တဲ့ အဖြစ်အပျက်ကလေးတွေကို ပြောပြမယ်။
ပထမအဖြစ်အပျက်။
အတော်လေးကြာခဲ့ပါပြီ။ ကျနော် မော်လမြိုင်ကို ပထမဆုံးရောက်ဖူးစဉ်တုန်းကပေါ့။ ကျိုက်ထီးကနေပြီးတစ်ဆင့်သွားတာပါ။ ကျနော်နှင့်အတူ ကျနော့်အကိုတစ်ယောက်လဲပါတယ်။ ဘုရားဖူးသွားကြတာပါ။ အဲဒီအချိန်တုန်းက မုတ္တမနှင့်မော်လမြိုင် မြစ်ကူးတံတားမရှိသေးဘူး။
မော်လမြိုင်ကို မရောက်ဖူးသေးပေမဲ့ ကျနော့်ရဲ့ ထုံးစံဝါသနာအတိုင်း မော်လမြိုင်အကြောင်းကို စပ်စုပြီးသား။
မော်လမြိုင်ကို ရထားတိုက်ရိုက်မရောက်ဖူး၊ မုတ္တမကတစ်ဆင့် ဇက်သင်္ဘောနဲ့ကူးရတယ်။ ရထားကဆင်းဆင်းချင်း ဇက်သင်္ဘောအမီ မြစ်ဆိပ်ကိုသွားရမယ်။ တစ်ခါတစ်ခါခပ်သွက်သွက်ပြေးသွားရလေ့ရှိတယ်။ မော်လမြိုင်ဘက်ရောက်ရင် ဆိုက်ကားဆရာတွေကို မြစေတီကျောင်းတိုက်လို့သာ ပြောလိုက်။ မသိတဲ့လူမရှိဘူး။ ၁၅၀ ကျပ်ဘဲပေးရတယ်။
အဲဒါတွေအားလုံး ကျနော်လေ့လာထားပြီးသား။ တောသားဆိုပေမဲ့ သိတယ်မဟုတ်လား။ အားလုံးသေချာမှ ခရီးစထွက်ခဲ့တာ။ သွားမဲ့နေရာက မော်ငံအရပ်က ဘုန်းကြီးကျောင်းတစ်ကျောင်းကိုပါ။ အဲဒီကမှ တစ်ဆင့် ဘုရားဖူးခရီးစတင်မှာပေါ့ဗျာ။
ကျနော်တို့ မုတ္တမလဲရောက်ရော သူများတွေပြေးနေတာတွေ့တာနဲ့.. ပြေးကြစို့.. ဆိုပြီး ညီအစ်ကိုနှစ်ယောက် သူများတွေပြေးတဲ့အရပ်ဘက်ကို တမ်းပြေးလိုက်တော့တာပါဘဲ။
ကံအားလျော်စွာဘဲ ဇက်သင်္ဘောဆီရောက်သွားတယ်။ ညဘက်မှောင်မှောင်ကြီးထဲမှာပါ။ မော်လမြိုင်ကမ်းဘက်ရောက်တဲ့အထိ အဆင်ပြေနေတုန်းပါဘဲ။ မော်လမြိုင်ဆိပ်ကမ်းပေါ်တက်ပြီး အနီးနားဝေ့၀ိုက်ကြည့်လိုက်တော့ ကွက်တိဒက်ထိ။ ဆိုက်ကားတွေ အများကြီးရပ်ထားတာတွေ့ရတယ်။
"ဆိုက်ကား အားလား"
"အားပါတယ်.. ညီရ... ဘယ်ကိုသွားမှာလဲ"
"မြစေတီကျောင်းတိုက်ကိုပါ"
"၂၀၀ ဘဲပေး၊ ဒါတောင် လျော့ထားတာ ဒီနေ့ညနေပိုင်း ဈေးဦးမပေါက်သေးလို့"
"ကျနော်တို့သွားနေကြပါ၊ ၁၅၀ဘဲပေးမယ်။ မရရင် မငှားတော့ဘူး"
"ညီလေးရ၊ မရဘူး၊ ကျန်တဲ့ဆိုက်ကားဆရာတွေကိုသွားငှားရင် ဒီထက်ပိုတောင်းလိမ့်မယ်။ မယုံရင်သွားမေးကြည့်"
ကျနော်တို့လဲ ဆိုက်ကားတွေ အတော်များများမေးပြီးမှ ၂၀၀ အထက်တွေချည်းဘဲတောင်းကြတာသိရတယ်။ ဒါပေမဲ့လဲ အတတ်နိုင်ဆုံး ဈေးဆစ်ပြီး ၁၈၀ နဲ့ အပေးအယူဖြစ်သွားကြတယ်။ ဒါပေမဲ့ ဆိုက်ကားဆရာလဲ အခုမှ အသစ်စက်စက်ဖြစ်ပုံရတယ်။ ကျနော်တို့သွားမဲ့ဘုန်းကြီးကျောင်းကို သူမသိဘူး။
"မြစေတီကျောင်းဆိုတာ ဟို ဘုရားပေါက်စလေးတည်ထားတဲ့ကျောင်းလား" လို့ သူကမေးတယ်။
ကျနော်တို့ကလဲ ကျောင်းရှိမှ ဘုရားရှိမှာဘဲဆိုပြီး "ဟုတ်တယ်အကို" လို့ မသိတာကို သိချင်ယောင်ဆောင်ပြီး ဖြီးလိုက်ကြတာပေါ့ခင်မျာ။
ဆိုက်ကားဆရာလဲ သူသိထားတဲ့ ဘုရားကိုဘဲ ဇွတ်နင်းတော့တာပါဘဲ။ ဘုရားကိုလဲ ရောက်ရော။ ဘုန်းကြီးကျောင်းနှင့်တူတာဆိုလို့ ဘာမှမတွေ့ရဘူး။ အိမ်တွေဘဲတွေ့နေရတယ်။ မေးကြည့်လိုက်မှ ရပ်ကွက်ဘုရားလေးမှန်းသိရတယ်။ မြစေတီကျောင်းတိုက်က မော်ငံအရပ်မှာ ရှိတယ်။ မြစေတီကျောင်းတိုက်ကို ရဲကျောင်းလို့ လူသိများတယ်။ မော်ငံအရပ်ကဆိပ်ကမ်းရဲ့ တောင်ဘက်ပိုင်းမှာ။ အခုဆိုက်ကားနင်းလာတာက မြောက်ဘက်ကျော။ အဲဒါမှ ဒုက္ခ။ သွားမဲ့နေရာက ပိုဝေးသွားပြီ။
ဆိုက်ကားဆရာလဲ အရမ်းစိတ်တိုသွားတယ်။ "မသိဘဲနဲ့ ဘာဖြစ်လို့ သိတယ်လို့ပြောရတာလဲ။ ကျနော်လဲ သိပ်ကျွမ်းသေးတာမဟုတ်ဘူး။ အခုတော့နှစ်ခါပင်ပန်းသွားပြီ" ဆိုပြီး ကျနော်တို့ ညီအစ်ကိုနှစ်ယောက်ကို ငါကိုင်ပြီး...ဆဲတော့တာဘဲဗျာ။ ကျနော်တို့လဲ ခပ်ရှက်ရှက်နဲ့ဘဲ.. "ဆောရီးဘဲ အကိုရာ.. အဲဒီကျောင်းကိုရောက်အောင်ကူညီပေးပါ" ဆိုပြီး သူခိုးလူမိသလိုပုံစံမျိုးလေးနဲ့ မျက်နှာကို ရှစ်ခေါက်ချိုးထားပြီး ပြုံးဖြီးဖြီးကြီးလုပ်ပြလိုက်ကြရတယ်။
ဆိုက်ကားဆရာလဲ အပြောဆိုးပေမဲ့ သဘောကောင်းရှာပါတယ်။ မော်လမြိုင်မြို့ ရောက်ဖူးရင် သိမှာပါ။ တောင်တွေ ဂမူတွေက အများသား။ ဆိုက်ကားဆရာခမျာ ချွေးတွေဒီးဒီးကျအောင် မတ်တပ်ရပ်ရက်သား အားကုန်စိုက်ပြီးနင်းပေးရှာပါတယ်။ နောက်ဆုံးတော့လဲ လိုရာခရီးရောက်ခဲ့ပါတယ်။ ဆိုက်ကားဆရာကိုတော့ ၂၂၀ ကျပ်ပေးလိုက်ပါတယ်။
ကျောင်းကိုရောက်ပြီး ဘုန်းဘုန်းလေးတွေကို အဖြစ်အပျက်အကြောင်းပြောပြလိုက်တော့ အားလုံးခပ်ပြုံးပြုံးဖြစ်နေကြတယ်။ ဘုန်းဘုန်းတစ်ပါးက "မင်းတို့ ဒီလောက်ပေးရတာ တော်သေးတယ် အခုခရီးက ၂၅၀.. ၃၀၀ ပေးနေရပြီ" လို့ ပြောပြမှ ဆိုက်ကားဆရာကို ပိုပိုတိုးပြီး လေးစားမိသွားတယ်။
ဆိုက်ကားဆရာ ကျန်းမာချမ်းသာပါစေ။
ကျနော်ဆိုလိုတာက
မသိဘဲနဲ့ သိချင်ယောင်ဆောင်ပြီးဆရာကြီးစတိုင်လုပ်ရင် ဒုက္ခလှလှတွေ့ရတတ်တယ်ဆိုတာကိုပါ။
အဲဒါကျနော့်ကိုယ်တွေ့ အဖြစ်အပျက်တစ်ခုပေါ့ခင်မျာ။ မိတ်ဆွေတို့လဲ အခုလိုပုံစံမျိုးတွေ့ဖူးကြမှာပါ။ ဒါကြောင့် မသိဘဲနဲ့ သိချင်ယောင်ဆောင်တာက ပိုပြီးခက်တယ်လို့ ကျနော်ပြောပြတာပါ။
ကျနော် ဆက်လက်ဖော်ပြပါဦးမယ်။
No comments:
Post a Comment