သူဌေးတော့သူဌေး.. ဒါပေမဲ့

"ကိုကိုမောင်ရေ့ ... ငါထီပေါက်ပြီကွ"
ကျနော်နှင့်အတူအင်္ဂလန်ရောက်လာခဲ့တဲ့ သူငယ်ချင်းတစ်ယောက်ရဲ့  ၀မ်းသာအားရအသံကြောင့် ကျနော်ကိုယ်တိုင်တောင် ထခုန်ရတော့မလိုလိုဖြစ်မိတယ်။ အပျော်ဓါတ်တွေကူးစက်သွားတာလေ။
ကိုယ့်သူငယ်ချင်းတစ်ယောက်လုံးထီပေါက်နေတာဘဲ ဘယ်မပျော်ဘဲနေပါ့မလဲ။

လန်ဒန်မှာ ထီတွေက အမျိုးမျိုး။ မြန်မာနိုင်ငံမှာလို တစ်လမှ တစ်ခါသာဖွင့်လှစ်တဲ့ အောင်ဘာလေထီကိုချည်း အားကိုးနေစရာမလိုဘူး။
ဒီမှာက ၀ါသနာပါရင် နေ့တိုင်းထိုးလို့ရတယ်။

DailyPlay
Lotto
Dream Number
Hotpick
EuroMillions
Thunderball
အဲဒါတွေကတော့ ကျနော်သိသလောက် ထီအမျိုးအစားတွေပါ။
Cardplay တွေကတော့အများကြီး။ ကတ်ကိုခြစ်ပြီးမှ ပေါက်မပေါက်သိရတဲ့ထီမျိုးပါ။
တစ်လုံးတိုက်ရင်ဘယ်လောက် နှစ်လုံးတိုက်ရင်ဘယ်လောက်ဆိုပြီး မက်လုံးတွေကလဲ အများသား။

အမျိုးမျိုးပါဘဲ။ ကြိုက်သလောက်ထိုး။ ကျသလောက်ရှင်း။ ပေါက်သလောက်ယူ။
သူတို့ခေါ်တဲ့ Jackpot ဆိုတဲ့ ဆုကြီးသာပေါက်ရင်တော့ နေ့ချင်းညချင်း သူများတွေ မျက်စိနောက်လောက်အောင် ကိုယ်ရောင်ကိုယ်ဝါတွေ ထွက်မှာသေချာတယ်။ EuroMillion Jackpot ဆုဆိုရင် တစ်ခါတစ်ခါ ပေါင်သန်းကိုးဆယ်ထိတက်လာတာလေ။ ဒီအပတ်ဘယ်သူမှမပေါက်ကြရင် Rollover system အရ နောက်အပတ်ဆုကြီးရဲ့ တန်ဖိုးကို ထပ်တိုးလေ့ရှိတယ်။ အကုန်လုံး ဒိုင်မစားဘူး။
လူဆိုတဲ့ သတ္တ၀ါတွေဟာ ပိုက်ဆံရှိတဲ့သူတွေကိုမှ ပိုမြင်တတ်ကြတယ်မဟုတ်လား။
Jackpot ကြီးလဲပေါက်၊ သူများတွေအကြည့်တွေကလဲ ကိုယ့်ဆီရောက်ပေါ့ဗျာ။

အခုကျနော့်သူငယ်ချင်းပေါက်တာက ကတ်ကိုဝယ်ပြီး ကိုယ်တိုင်ခြစ်ပြီးမှ ပေါ်လာတဲ့ အမှတ်အသားအရ ပေါက်တယ်လို့သိရတဲ့ထီပါ။
ဥပမာ ကတ်ပေါ်မှာ ဆင်ရုပ်ကလေးရှိမယ်။ ပြီးတော့ 3 elephants to win(ဆင်သုံးကောင်ဆိုရင် ပေါက်ပြီ) ဆိုတဲ့ စာတမ်းလေးရေးထားမယ်။ ကတ်ထဲမှာ အကွက် ၉ ကွက်ရှိတယ်။တစ်ကွက်ကို အရုပ်တစ်ခု။ ခြစ်ကြည့်မှမြင်ရမှာပါ။ ၉ ကွက်ထဲမှာ တချို့ အကွက်တွေက တစ်ခြားအရုပ်တွေဖြစ်နိုင်တယ်။ ဒါပေမဲ့ ၉ ကွက်ထဲမှာ ဆင်သုံးကောင်ပါရင် အဲဒီထီပေါက်ပြီ။

"ကိုကိုမောင်ရေ... ငါထီပေါက်ပြီကွ။ အခုသွားထုတ်ရအောင်"
ကျနော့်သူငယ်ချင်းတစ်ယောက် အဲဒီကတ်ထီလေးကို လမ်းလျောက်သွားရင်းထိုးလာခဲ့တာပါ။ အိမ်ရောက်ရောက်ချင်းဘဲ တစ်ဆယ်တန်ပဲနိ အစေ့လေးနဲ့ ကတ်ကလေးကိုခြစ်ကြည့်ပြီးနောက် ကျနော့်ကို ပီတိတွေဖုံးနေတဲ့မျက်လုံးကြီးနဲ့ပြောလိုက်ခြင်းပါဘဲ။

"ဟာ အခုမှအပြင်ကပြန်လာတာ... ညနေမှ သွားထုတ်ကြမယ်လေ"

"ဟီး ဟီး ငါက အခုထုတ်ချင်နေတာ၊ ညနေထိမစောင့်နိုင်တော့ဘူး"

"ဒါဖြင့်လဲ မင်းတစ်ယောက်ထဲ သွားထုတ်လေ။ ငါ မလိုက်တော့ပါဘူး"

"အဲဒီလိုတော့ မလုပ်နဲ့လေ.. ဒီနိုင်ငံအကြောင်းလဲ သိတယ်မဟုတ်လား.. ပိုက်ဆံလေး ပေါင်ငါးဆယ်လောက်နဲ့တောင် လူသတ်မှုဖြစ်ကြတယ်ဆိုတော့.. အခုငါရမဲ့ငွေက အများကြီးကွ... တော်ကြာ သူဌေးမဖြစ်ဘဲနဲ့ သေဌေးဖြစ်နေဦးမယ်။ လိုက်ခဲ့ပါကွာ.. အခုသွားမယ်"

သူ့မျက်နှာကြည့်ရတာလဲ တကယ်ကိုညနေထိ မစောင့်နိုင်တော့တဲ့ပုံစံမျိုး။ အေးလေ... သူ့နေရာမှာ ကျနော်ကိုယ်တိုင်ဖြစ်နေရင်လဲ
ဒီလိုဘဲ စိတ်မြန်နေမှာ အသေအချာပါဘဲ။

"အမြင့်ဆုံးဆု (Jackpot)က ဘယ်လောက်လဲ"

"ပေါင်သုံးသောင်း"

ဟိုက်ရှားဘား... တကယ်လို့သာ အမြင့်ဆုံးဆုကြီး သူငယ်ချင်းပေါက်ရင်.. ပေါင်သုံးသောင်းဆိုတော့.. ဒေါ်လာ ခြောက်သောင်း.. မြန်မာကျပ်ငွေနဲ့တွက်ကြည့်ရင် သိန်းခြောက်ရာကျော်။ ဟာ.. အများကြီးပါလား။ ကျနော်လဲ ဘာမှမစဉ်းစားတော့ဘဲ အပြင်ကို ပြန်ထွက်ဖို့သဘောတူလိုက်တယ်။

ဒီလိုနဲ့ဘဲ သူငယ်ချင်းနှစ်ယောက် မရှိတဲ့ဗလကို ရင်ကော့အောင် ထုတ်ပြပြီး လာမထိနဲ့ ထိရင်မီးပွင့်သွားမယ်ဆိုတဲ့ ပုံစံမျိုး ခန္ဓာကိုယ်ကို မြောက်ကြွမြောက်ကြွလုပ် ဘယ်သူ့ကိုမှ ဂရုမစိုက်လေဟန်နှင့် ထီအရောင်းဆိုင်ကို ချီတက်သွားလိုက်ကြတယ်။
နှစ်ယောက်လုံးရဲ့ မျက်နှာကို သေချာစိုက်ကြည့်ရင်တော့ ပြုံးဖြီးဖြီးကြီးဖြစ်နေတာကို မြင်ရမှာ သေချာတယ်။
ဟုတ်တယ်လေ။ သူငယ်ချင်းထီပေါက်မှတော့ အနည်းဆုံး ကျနော်ကြိုက်တဲ့ KFC ကတော့ ကျိန်းသေပေါက် ၀ါးရတော့မှာကိုး။

ထီဆိုင်ရောက်ရောက်ချင်းဘဲ ကျနော့်သူငယ်ချင်းက နှစ်ပေါင်း ၁၅ နှစ်လောက် သင်ယူလာခဲ့တဲ့ အင်္ဂလိပ်စကားကို စတိုင်ကျကျ အသုံးချလိုက်တယ်။
"Excuse me, sir,
I win lottery, please check the ticket, here it is"
"ကျနော်ထီပေါက်တယ်၊ စစ်ကြည့်ပါ။ ဟောဒီမှာ ထီလက်မှတ်"

ဆိုင်ရှင်ကလဲ ထီလက်မှတ်ကို လှမ်းယူကာ အံဆွဲထဲက ၁၀ပေါင်တန်အကြွေတစ်စေ့ကို ထုတ်ယူလိုက်ပြီး ကတ်ကိုခြစ်ကြည့်လိုက်တယ်။
ပြီးတော့ ကျနော့်သူငယ်ချင်းကို ပြောလိုက်တယ်။
"ဟုတ်တယ် ခင်များထီပေါက်တယ်၊
ရော့ ဟောဒီမှာ ခင်များရမဲ့ ပိုက်ဆံ"

သူပေးတဲ့ပိုက်ဆံကို သေချာကြည့်လိုက်တော့ နှစ်ပေါင်တန်အစေ့တစ်စေ့ထဲ။ မျှော်လင့်ထားတာက Jackpot ပေါင် သုံးသောင်း။ တကယ်ရလာတာက နှစ်ပေါင်ထဲ။ ဘယ်လိုတွေ ဖြစ်ကုန်ပြီလဲ။ ဘယ်လိုအဓိပ္ပါယ်ဖော်ရမှန်းမသိတဲ့ မျက်စပစ်ခြင်းမျိုးနဲ့ တစ်ယောက်မျက်နှာ တစ်ယောက်ကြည့်လိုက်မိကြတယ်။
သူထုတ်ပြတဲ့ကတ်နမူနာကိုသေချာကြည့်လိုက်တော့မှ အကွက် ၉ ကွက်ရဲ့ ဘေးနားမှာ ထပ်ခြစ်ကြည့်စရာတစ်ကွက်ရှိနေသေးတာကိုတွေ့ရတယ်၊ အဲဒီအကွက်က ပေါက်ဂဏန်းရဲ့ တန်ဖိုးကို ဖော်ပြတဲ့အကွက်ဘဲ။ ကြိုတင်သိရင် ကိုယ်တိုင်ခြစ်ရင်လဲ ရတာဘဲလေ။ ကိုယ်တိုင် မခြစ်လိုက်ရတာကိုတော့ စိတ်မကောင်းဖြစ်မိတယ်။ ဒါက ကံတရားဘဲလေ။ ကံတရားနှင့်အလောင်းအစားလုပ်ရတာဆိုတော့ ဒီလောက်တော့ ကြုံရမှာပေါ့။


"Two pounds is better than nothing"
"ဘာမှ မရှိတာနဲ့စာရင်တော့ နှစ်ပေါင်စေ့လဲ အသုံးဝင်ပါသေးတယ်ကွာ" လို့ ကျနော်
ပြောလိုက်တဲ့အခါ သူငယ်ချင်းကလဲ ငိုမလို ရယ်မလို မျက်နှာမျိုးကြီးနဲ့ "တော်တော်ကို မာယာများတဲ့ထီလောကကြီးဘဲနော်" ဆိုပြီး ကလေးမွေးခါနီး လင်ယောက်ျားကို စိတ်ကုန်တဲ့ အမျိုးသမီးတစ်ယောက်ရဲ့ လေသံမျိုးနဲ့ ညီးညူနေတာကို ကျနော်ကြားလိုက်ရတယ်။

နှစ်ပေါင်တန်တစ်စေ့ကို ကျစ်ကျစ်ပါအောင်ဆုပ်ပြီး လာလမ်းအတိုင်း သားကောင်မရခဲ့တဲ့ ကျားတစ်ကောင်ပုံစံမျိုး ခပ်ကုတ်ကုတ်
ပြန်လာခဲ့ကြပါတယ်။ အိမ်ရောက်တယ်ဆိုရင်ဘဲ ထီပေါက်လို့ ထုတ်လာပြီးတဲ့အကြောင်းကို ကျန်တဲ့သူငယ်ချင်းတွေကိုပြောပြရင်း ငိုအားထက် ရယ်အားသန်ပါဘဲ။
KFC မစားရမှန်း သိရှိသွားရပြီဖြစ်တဲ့အတွက် ကျနော်လဲ ပိုက်လုံးကလာတဲ့ရေကို ဖန်ခွက်ကြီးကြီးထဲထည့်ပြီး ဂလု ဂလု လို့ အသံမြည်အောင် အားရပါးရသောက်ပစ်လိုက်ပါတယ်။

သင်္ဘောသားတော့ သင်္ဘောသားပါ၊ ဒါပေမဲ့ ရန်ကုန်-တွံတေးသင်္ဘောသား ဆိုတဲ့သီချင်းလေးလိုဘဲ
ကျနော့်သူငယ်ချင်းလဲ ထီပေါက်လို့ သူဌေးအမည်ကို ခံယူမယ်ဆိုရင် သူဌေးတော့သူဌေးပါ ဒါပေမဲ့ နှစ်ပေါင်တန်သူဌေးလို့ ခေါ်ဆိုနိုင်ကြောင်းပါခင်များ။

မှတ်ချက်။ ။
ထီလောကရဲ့ မာယာတွေကို သဘောပေါက်သွားပြီး ကျနော့်သူငယ်ချင်းတစ်ယောက် အဲဒီအချိန်ကစပြီး ထီဆိုင်ဘက်ကို ဘယ်တော့မှ မသွားတော့ဘူးလို့တော့ မထင်လိုက်ကြပါနဲ့။ ဒီလောက်တောင် ပေါက်မဲ နည်းရသလားဆိုပြီး တစ်ဆင့်တိုးလို့ အများကြီးထပ်ထိုးနေဆဲပါဘဲ။ ဟဲ ဟဲ ရိုင်းရိုင်းပြောရရင် ကလေးမွေးပြီးလို့ ရက်တွေ အတော်ကြာလာတဲ့အခါ လင်ယောက်ျားအပေါ် အချစ်တွေ ထပ်ထပ်တိုးပြီး ပိုပိုဆိုးလာတဲ့ မိန်းမတစ်ယောက်ရဲ့ ပုံစံမျိုးပေါ့ ခင်များ။