သီတင်းကျွတ်လပြည့်နေ့။
ပ၀ါရဏာနေ့လေးကပေါ့။ ကျနော်လဲ ဘုန်းတော်ကြီးကျောင်းတစ်ကျောင်းကိုရောက်သွားတယ်။
ဗုဒ္ဓဘာသာဝင်တွေရဲ့ ထုံးစံအတိုင်း သံဃာတော်တွေကို ဖူးမြင်ဖို့ပေါ့ဗျာ။ သီတင်းဝါလကျွတ်ပြီဆိုရင် ကျနော်တို့ ဗုဒ္ဓဘာသာမြန်မာလူမျိုးတွေဟာ သက်ကြီးတွေကို ပူဇော်ကန်တော့ကြတယ်။ သံဃာတော် အရှင်သူမြတ်တို့ကို ကန်တော့ဖို့ ဘုန်းတော်ကြီးကျောင်းတွေကို သွားတတ်ကြတဲ့ အလေ့အထလဲရှိကြတယ်မဟုတ်လား။
ကျနော်လဲ ဘုရားဖူးချင်လွန်းလို့ ဘုန်းကြီးကျောင်းတစ်ကျောင်းကို သွားခဲ့တာပါ။ ကျနော်ဘုန်းကြီးကျောင်းရောက်ချင်းဘဲ ဘုရားခန်းဝင်ပြီး ရထားသမျှဘုရားရှိခိုးစာလေးတွေကိုရွတ်ဖတ်ပြီး ဘုရားကို ပူဇော်လိုက်ပါတယ်။
ကလင်... ကလင်.. ကလင်
ဘုရားပူဇော်ပြီး မကြာခင်မှာဘဲ ကျောင်းတံခါးမှာ တပ်ဆင်ထားတဲ့ လူခေါ်ဘဲလ်လေး မြည်သံကို ကျနော်ကြားလိုက်ရတယ်။ ဘုန်းဘုန်းတွေလဲ အပေါ်ထပ်မှာ သီတင်းသုံးနေကြတဲ့အတွက် ကျနော်ကိုယ်တိုင်ဘဲ တံခါးသွားပြီး ဖွင့်ပေးလိုက်ပါတယ်။ တံခါးလာခေါက်လာတဲ့သူက နှစ်ယောက်။ တစ်ယောက်က အမျိုးသား၊ တစ်ယောက်က အမျိုးသမီး။ နှစ်ယောက်လုံးရဲ့ လည်ပင်းမှာ ကဒ်ပြားလေးတွေကိုယ်စီနဲ့။
ကျနော်ထိတ်လန့်သွားတယ်။ "သက်ဆိုင်ရာတာဝန်ရှိတွေများလားမသိဘူး။ လည်ပင်းမှာလဲ ကဒ်ပြားတွေနဲ့။ ဒီဘုန်းကြီးကျောင်းမှာ ဘာများသတင်းရထားလို့ ရှောင်တခင် ၀င်ပြီးစစ်ဆေးတာလဲ မသိဘူး"လို့
စဉ်းစားမိလိုက်တယ်။။
ဒါနဲ့ ကျနော်က "ဘာကိစ္စပါလဲခင်မျာ" လို့ အင်္ဂလိပ်လိုမေးလိုက်တယ်။ အမျိုးသမီးလေးက ပြန်ဖြေတယ်။ "ဒါဘုန်းကြီးကျောင်းလား" တဲ့။ ကျနော်အတော်လေးအံ့သြသွားတယ်။ ဘာဖြစ်လို့လဲ ဆိုတော့ သူပြောတာက မြန်မာလိုပြောလိုက်တာကိုးဗျ။
"ကျမတို့ ဘုရားလဲဖူးချင် ဘုန်းကြီးတွေကိုလဲ ဖူးချင်လို့ ၀င်လာတာပါ။ ကျမက ရှမ်းပြည် လားရှိုးကပါ။ ဒါက ကျမအမျိုးသား၊ သူက ဒီနိုင်ငံသားပါ"
ကျနော်လဲ တံခါးဖွင့်ပေးပြီး ဘုရားခန်းကိုလိုက်ပြပေးလိုက်တယ်။
ဘုန်းဘုန်းလေးတစ်ပါးကိုလဲ ပင့်ပေးလိုက်တယ်။ အဲဒီအမျိုးသမီးလေးလဲ ဘုရားကို ရိုရိုသေသေဦးချပြီး ဘုန်းဘုန်းလေးနှင့်စကားစမြည်ပြောတယ်။ ကျနော်က သူတို့အနားမှာ ရှိနေတာဆိုတော့ သူပြောတာတွေ အကုန်လုံးကြားရပါတယ်။
"တပည့်တော်မ ဒီလန်ဒန်ရောက်တာ ၅ နှစ်လောက်ရှိပါပြီ။ ဒါက တပည့်တော်မရဲ့ အမျိုးသားပါ။ သူကဗုဒ္ဓဘာသာမဟုတ်ဘူး။ တပည့်တော်မက ကုမ္မဏီတစ်ခုမှာ အလုပ်လုပ်ပါတယ်။ ဒီကဒ်ပြားလေးတွေကလဲ တပည့်တော်မတို့လုပ်တဲ့ ကုမ္မဏီက ကဒ်ပြားပါဘုရား။
အခု အလုပ်ကနေတစ်ခါထဲ လာခဲ့တာပါ။ ဘုန်းတော်ကြီးကျောင်းတွေလိုက်ရှာနေတာကြာပြီဘုရား။ မြန်မာတွေနဲ့လဲ သိပ်အသိမရှိတော့ ဘယ်နားမှာ သွားရှာရမှန်းလဲမသိဘူး။
အခုတောင် တပည့်တော်မရဲ့ အမျိုးသားက ရှာပေးလို့ရောက်ခဲ့တာပါ။
တပည့်တော်မကလာရှိုးကပါ။ လာရှိုးမှာနေတုန်းကတော့ ဘုန်းကြီးတွေအများကြီးရှိနေလို့ တန်ဖိုးထားတတ်မှန်းမသိဘူးဘုရား။ ရဟန်းငယ်လေးတွေ လူငယ်ပီပီ လွတ်လွတ်လပ်လပ် လျောက်သွားနေတာတောင် အပြစ်တင်မိခဲ့သေးတယ်။ အခုဒီရောက်ပြီးတော့လဲ အတော်လေးကြာတဲ့အထိ ဘုန်းကြီးကျောင်းတွေကို အမှတ်မရခဲ့ပါဘူး။ ဒီနှစ်ပိုင်းမှာမှ အရမ်းလာချင်လွန်းလို့ စုံစမ်းပြီးလာခဲ့တာပါဘုရား။
သံဃာတော်တွေကို အရမ်းဖူးချင်တာဘဲဘုရား။ နောက်ကိုမကြာမကြာလာပြီး ဆွမ်းလာကပ်ပါဦးမယ်ဘုရား"
စတဲ့ စတဲ့ စကားတွေ အဆက်မပြတ်တလစပ် (နှစ်ပေါင်းများစွာကွဲကွာနေပြီး ပြန်တွေ့ကြတဲ့ မိသားစု ပုံစံမျိုး) အားရပါးရပြောနေရှာတယ်။ သူ့မျက်နှာကို လှမ်းကြည့်လိုက်တော့ ပီတိကြောင့်ကျတဲ့ မျက်ရည်စတွေ တွဲခိုနေလေရဲ့ ။
ကျနော်လဲ သူ့ရဲ့ စကားကိုနားထောင်ရင်း သူနှင့်ထပ်တူထပ်မျှ ၀မ်းသာကြည်နူးဖြစ်ခဲ့မိပါတယ်။ ကျနော်အပါအ၀င် လူတွေရဲ့ သဘာဝဟာ တစ်ခုခုရှိနေရင် ပိုင်ဆိုင်နေရရင် တန်ဖိုးမထားတတ်ကြဘူးလေ။
ဆုံးရှုံးတော့မှ ဝေးသွားတော့မှ တန်ဖိုးရှိမှန်း ပြန်သိလာတတ်ကြတယ်မဟုတ်လား။ ကျနော်လဲ သူတို့အကြောင်းလေးတွေ စဉ်းစားရင်း စိုင်းထီးဆိုင် သီဆိုထားခဲ့တဲ့ သီချင်းလေးတစ်ပုဒ်ကို သွားအမှတ်ရမိလိုက်တယ်။ "နီးလွန်းတော့ ရန်တွေဖြစ် ဝေးသွားတော့ လွမ်းကျန်ရစ် " တဲ့။
No comments:
Post a Comment