ကျနော်မြန်မာနိုင်ငံမှာနေစဉ်တုန်းက
ငှက်ဖျားဒဏ်ကို အလူးအလဲခံစားရနေရတဲ့ ဆရာတော်ကြီးတစ်ပါးကို ဆေးရုံမှာ သွားဖူးဘူးတယ်။ ငှက်ဖျားမှတကယ့်အပြင်းစား ငှက်ဖျားဘဲ။ ဗန်းမော်ဘက်ကို တရားဟောသွားရင်း ထိလာခဲ့တဲ့ ငှက်ဖျားတဲ့။ ကြောက်စရာအရမ်းကောင်းတယ်။ ဒီလောက် သီလ သမာဓိနဲ့ပြည့်စုံတဲ့ ဆရာတော်ကိုယ်တိုင် ငှက်ဖျားဒဏ်ခံနေရစဉ်မှာ ပါးစပ်ထဲတွေ့ရာတွေလျောက်ပြောတယ်။ ကျင်ငယ်စွန့်ရင်တောင် (ကန်တော့်ပါရဲ့ ) အကူအညီနဲ့ သေချာ ကျင်ငယ်ဘူးထဲ ထည့်ပေးပြီးမှ စွန့်ရတယ်။ ကျင်ငယ်စွန့်ချင်တယ်ဆိုတဲ့ စိတ်ကို ခံစားလို့ရပေမဲ့ လူနာစောင့်တွေရဲ့  ကျင်ငယ်စွန့်တဲ့အခါ ကူညီပေးမှုကို ဆရာတော်သတိထားမိပုံမပေါ်ဘူး။
ဆရာဝန်တွေရဲ့  စေတနာနှင့်ဆေးစွမ်းတွေရဲ့  ထက်မြက်မှုကြောင့် ဆရာတော့်ရောဂါ နလန်ထူလာပါတယ်။ နေကောင်းခါစမှာ ဆရာတော်ကျင်ငယ်သွားချင်တယ်လို့ ပြောတော့ လူနာစောင့်တွေက ဆရာတော်ကို ကူညီဖို့ လုပ်ကြတယ်။ ဒါပေမဲ့ ဆရာတော် လက်မခံတော့ဘူး။ ဘယ်သူ့ကိုမှလဲ ကျင်ငယ်စွန့်ဖို့ နေရာကို မခေါ်တော့ဘူး။
သတိဝင်သွားပြီလေ။ ရှင်းရှင်းပြောရင်တော့ ရှက်ပြီပေါ့ဗျာ။
ကျန်းမာရေး မကောင်းစဉ်ကသာ ဦးဏှောက်ထဲငှက်ဖျားပိုးရောက်လုနီးနေလို့ ဘာမှမသိဘဲ လူနာစောင့်တွေ ပြုစုသမျှကို ဆရာတော် သတိမထားမိခဲ့တာပါ။ နေကောင်းတဲ့အခါမှာ ဘယ်သူ့ကိုမှ အနားမကပ်ခံတော့ပါဘူး။
ဒီလောက်ပြင်းထန်တဲ့ ငှက်ဖျားရောဂါကို ခံစားရတဲ့ ဆရာတော်ဟာ အဲဒီငှက်ဖျားရောဂါက ပြန်ကောင်းလာပြီး သူ့ကျောင်းသူပြန်ရောက်တဲ့အခါမှာ စကားတစ်ခွန်းပြောတယ်။
"တော်သေးတယ်.. ဒီတစ်တောင်ကို ကျော်ခဲ့နိုင်ပြန်ပြီ" တဲ့။
................
ကလင်..ကလင်...ကလင်
ဒီနေ့ နေ့လည်နှစ်နာရီလောက် ကွန်ပျူတာတစ်လုံးနှင့် အလုပ်ရှုပ်နေခိုက် အပြင်တံခါးဘဲလ်မြည်သံ ကြားလိုက်ရတယ်။ ဧည့်သည်တစ်ယောက် (ဒါမှမဟုတ်) စာပို့သမားတစ်ယောက်ယောက်ဖြစ်မှာပါ လို့ ကျနော်ထင်ခဲ့တယ်။ ကျနော့်သူငယ်ချင်းတစ်ယောက် တံခါးဖွင့်ပေးလိုက်တယ်။
"ကိုကိုမောင် ကိုကိုမောင်ရေ့ .. မင်းအတွက်စာ.. မင်းကိုယ်တိုင် လက်မှတ်ထိုးယူရမယ်တဲ့.."
ကျနော် တံခါးပေါက်ဝကို ထသွားလိုက်တယ်။ စာပို့တဲ့သူက ခါတိုင်းပို့နေကျသူမဟုတ်ဘူး။ ခါတိုင်းဆို ကိုယ်စားလက်မှတ်ထိုးလို့ ရတယ်၊ ဒီနေ့မှ ဘာဖြစ်လို့ကိုယ်တိုင် လက်မှတ်ထိုးယူရမှာပါလိမ့် လို့ ကျနော် စဉ်းစားမိတယ်။ ပြီးတော့ အိုင်ဒီ ပြရဦးမယ်တဲ့။ ကျနော့်လဲ ကျနော့်ပတ်စ်ပို့ယူပြီး ပြလိုက်တယ်။
လက်မှတ်ထိုးဖို့ နေရာက ခါတိုင်းလို စာရွက်ပေါ်မှာ မဟုတ်ဘူး။ ဖန်သားပြင်လေးပေါ်မှာ သူယူလာတဲ့ ခဲတံပုံစံ အချောင်းကလေးတစ်ချောင်းနဲ့ ထိုးလိုက်ရတယ်။
လက်မှတ်ထိုးပြီး စာအိပ်ခပ်ရှည်ရှည်လေးကို ပေးခဲ့တယ်။ သူပြန်သွားပြီးစာအိပ်ကို ဖောက်ဖတ်ကြည့်လိုက်တယ်။
"ဟိုက်ရှားဘား..... စာအိပ်ထဲမှာ ကဒ်ကလေးတစ်ကဒ်ပါလာပါလား။ ဘာများပါလိမ့်"
သေချာကြည့်လိုက်တော့မှ ကျနော့်အိုင်ဒီကဒ်ဖြစ်နေတာကိုး။ ဗီဇာသက်တမ်း တိုးပေးလိုက်တဲ့ အိုင်ဒီကဒ်ကလေးပါဘဲ။ ဗီဇာကို စာအုပ်မှာ မထုပေးတော့ဘဲနဲ့ သီးသန့် အိုင်ဒီကဒ်ကလေးဘဲ ထုတ်ပေးတယ်။ ၁၈ ရက်နေ့ကမှ ဗီဇာရုံးကိုသွားပြီး ဗီဇာလျောက်ထားတာ။ ဒီနေ့ ၂၀ ရက်နေ့မှာ ဗီဇာရပြီဆိုတော့ ၀မ်းသာလိုက်တဲ့ ဖြစ်ခြင်း။ ၂၀၁၀ ဧပြီလကုန်အထိ လန်ဒန်မှာ နေထိုင်ခွင့်ရသွားပြီ။
အထက်က ငှက်ဖျားဒဏ်အလူးအလဲခံရပြီး ပြန်နေထိုင်ကောင်းတဲ့အခါ အမိန့်ရှိတဲ့ ဆရာတော်ရဲ့  စကားနဲ့ ပြောရရင်တော့...
"တော်သေးတယ်..... ဒီ(တစ်နှစ်ဗီဇာ)တောင်ကိုတော့ ကျော်ခဲ့နိုင်ပြန်ပြီ" ဟူ၍သာ။
1 comment:
ဝမ်းသာပါတယ် ကိုကိုမောင် အဆင်ပြေ၂နဲ့သက်တမ်း တိုးပြီးနေထိုင်ခွင့်ရတာ
Post a Comment