အကူအညီလိုလို့ တင်လိုက်တာပါ

ဗီဇာတိုးဖို့အတွက် လှုပ်ရှားရင်းနှင့် နေရာအတော်များများကို ရောက်ရှိခဲ့တယ်။ အထူးသဖြင့်တော့ လီဗာပူးစထရိ(တ်)ဘူတာ၊ ဗစ်တိုးရီးယားဘူတာ၊ လန်ဒန်ဘရစ်ဂ်ျဘူတာ၊ အဲဒီဘူတာတွေက အရမ်းကြီးကျယ်ခမ်းနားတယ်။ စားသောက်ဆိုင်တွေရှိတယ်။ ကော်ဖီဆိုင်တွေရှိတယ်။ တစ်ခြားဆိုင်အတော်တော်များများလဲ ရှိတယ်။ တကယ့်ကို သားနားတဲ့ ဘူတာကြီးတွေပါဘဲ။

မြေအောက်ရထား မြေပေါ်ရထား ၀င်ချိန် ထွက်ချိန်စာရင်းကို စခရင်း (ဖန်သားပြင်)နှင့်ပြထားတယ်။ စခရင်းပေါ်မှာ တွေ့မြင်ရတဲ့ ပလက်ဖောင်းနံပါတ်၊ သွားရမဲ့ခရီးတွေအတိုင်း အချိန်အတိအကျဘဲ။ မလွဲဘူး။
ဖျက်သိမ်းရင် ဖျက်သိမ်းတဲ့အကြောင်းကြေငြာတယ်။ နားမလည်ရင် ဘူတာဝန်ထမ်းတွေကို မေးလို့ရတယ်။ စိတ်ရှည်လက်ရှည်ဖြေကြားပေးတယ်။

မြန်မာမှာ ကျနော် မီးရထားနဲ့ခရီးသွားတုန်းက ရထားအချိန်မသိလို့ သွားမေးတာကို ၀န်ထမ်းတွေ ပြေပြေလည်လည်မဖြေပေးကြဘူး။ ဘလက်ဘောမှာ ရေးထားတာ မမြင်ဘူးလား။ အဲဒီမှာ သွားကြည့် ဆိုပြီး ငေါက်လွတ်တာ ခံခဲ့ရဖူးတယ်။ ဘလက်ဘောကို သွားကြည့်တော့လဲ လွန်ခဲ့တဲ့ နှစ်ရက်လောက်က ဖြေဖြူနဲ့ရေးထားတဲ့ ရထားခန့်မှန်းချိန်တွေကိုဘဲ တွေ့ရတယ်။ Update မလုပ်ထားဘူး။ ဟဲ ဟဲ Update ဆိုလို့ အထင်မကြီးလိုက်နဲ့ဦး။ ဘောဖျက်နှင့်ဖျက်ပြီး မြေဖြူနှင့်ရထားထွက်ချိန်စာရင်းကို မရေးထားရသေးတာကိုပြောတာ။ (မြန်မာ့မီးရထားဝန်ထမ်းတွေကို သတိရလို့ ညှပ်ထည့်လိုက်တာပါ)။

ဓါတ်ပုံဝါသနာပါတဲ့သူတွေအတွက်ကတော့ ခုနကပြောခဲ့တဲ့ ဘူတာရုံတွေထဲမှာ တဖျတ်ဖျတ်ရိုက်ကြရုံပေါ့ဗျာ။
တကယ်လဲ ဓါတ်ပုံရိုက်စရာကောင်းပါတယ် (ကျနော့်အမြင်အရပြောတာ)။ ကျနော်ကလဲ ရှုခင်းတို့ မြင်ကွင်းခပ်ဆန်းဆန်းတို့ဆို ဓါတ်ပုံရိုက်ရတာ ၀ါသနာပါလေတော့ အကြိုက်တွေ့သွားတာပေါ့ဗျာ။
နီကွန်ကင်မရာ ခပ်ပါးပါးလေးကို အိပ်ထဲက ထုတ်လိုက်ပြီး ဓါတ်ပုံရိုက်ဖို့ နေရာကို ရွေးလိုက်တယ်။
ဟော...တွေ့ပြီ။ ရထားအချိန်စာရင်းတွေပြထားတဲ့ ဖန်သားပြင်စခရင်ပြားကြီးတွေရှိတဲ့ဘက်ကို အရင်ဦးဆုံးရိုက်မယ်ပေါ့ဗျာ။

ကင်မရာကိုလဲ ချိန်လိုက်ရော မြင်ကွင်းက မရှင်းဘူးဖြစ်နေတယ်။ အပြင်ဘက်မှာရှင်းသလောက် ကင်မရာထဲမှာ မရှင်းမလင်းဖြစ်နေတယ်။ ဘာဖြစ်လို့ပါလိမ့်။ ခါတိုင်းရိုက်နေကျဆိုရင် ရှင်းရှင်းလင်းလင်းဘဲ။ ဒီနေ့ ဘာဖြစ်နေလဲ မသိဘူး။ ကင်မရာမကောင်းလို့တော့မဖြစ်နိုင်ဘူး။ ကျနော့်လိုင်စင်ဓါတ်ပုံတွေအားလုံးကို ဒီကင်မရာနှင့်ရိုက်ပြီး Photoshop နှင့်ဖြတ်တောက် ကူးထားတာ ရှယ်ချည်းဘဲ။ ဘာများမှားနေပါလိမ့်။

ကင်မရာကို စစ်ဆေးကြည့်လိုက်တော့မှ ကင်မရာ lens ပေါ်မှာ အကွက်ကလေးတစ်ကွက်တွေ့လိုက်တယ်။ အလည်တည့်တည့်ကို ကွက်နေတာ။ ဒုက္ခဘဲ။ ဘာကွက်ကြီးပါလိမ့်။ အပြန်ပြန်အလှန်လှန်စဉ်းစားကြည့်လိုက်တော့မှ မူရင်း ဇစ်မြစ်က ပေါ်လာတယ်။

လွန်ခဲ့တဲ့ တစ်ပတ်လောက်က ကင်မရာဘေးက ဘောင်အဆက်ကလေး နဲနဲကွာချင်သလိုလိုဖြစ်လာလို့
ဆင်ကော်နှင့်ကပ်ဖြစ်တယ်။ ဆင်ကော်က မြန်မာမှာရှိတဲ့ ဆင်ကော်လို ခဲပြစ်ပြစ်မဟုတ်ဘဲ အဖျော်ရည်ပုံစံဖြစ်နေတယ်။ ခြောက်သွားမှ ကပ်တယ်။ ကင်မရာဘောင်ကို ပိုပြီး မြဲအောင်လို့ ကော်ရည်များများညှစ်ထုတ်ပြီး ကင်မရာဘောင်သားလေးကို လိမ်းကျံလိုက်တယ်။ အဲဒီကတစ်ဆင့် ကင်မရာထဲ ၀င်သွားပြီး ကင်မရာ lens ပေါ်ပါ ဖြတ်သန်းစီးဆင်းသွားဟန်တူပါရဲ့ ။ ကင်မရာ lens ပေါ်မှာ အကွက်ကြီး ထင်နေတယ်။

ကျနော် တတ်နိုင်သမျှကြိုးစားရှင်းလင်းပေမဲ့ မရဘူးဖြစ်နေတယ်။
အဲဒါကြောင့်..
မိတ်ဆွေများ အဲဒီဆင်ကော်ကို ခြေဖျက်တဲ့ ဆေးတစ်မျိုးရှိရင် ကျနော့်ကို အကြံပေးကြပါဦးလို့ ဒီပို့စ်ကလေးကဘဲ အကူအညီတောင်းလိုက်ပါတယ်။ ပြီးတော့ မှန်ဘီလူးချိန်းလိုက်ရင် အဆင်ပြေမပြေလဲ သိချင်ပါတယ်။ ကင်မရာဘောင်ကို ဆင်ကော်နှင့်ကပ်ထားပြီးပြီဆိုတော့ ပြန်ခွါလို့ ရ မရလဲ ကျနော်သိချင်ပါတယ်ခင်များ။
မိတ်ဆွေတို့ တတ်တဲ့ပညာနဲ့ ကျနော့်ကိုကူညီပေးကြပါဦးလို့ မျက်နှာပူပူနဲ့ဘဲ တင်ပြလိုက်ရပါတယ်။

စုံထောက်ကျော်ကြီး ဦစံရှားရဲ့  မှားတဲ့အခါလဲ မှားပေမပေါ့ စကားလုံးကိုယူပြီး
မုဆိုးကျော်တွတ်ပီရဲ့  ဒီနေ့ ကံမကောင်းပါလားလို့ တစ်တွတ်တွတ် ညီးညူရွတ်ဆိုနေရမလိုဖြစ်နေပြီ။
ဟဲ ဟဲ ကျနော်ကတော့ မိတ်ဆွေတို့ရဲ့  ကျေးဇူးတရားကြောင့် ကံကောင်းလိမ့်မယ်လို့ ယုံကြည်နေလျက်ပါဘဲ။
ရွှင်လန်းကြပါစေ။