Thursday 11 December 2008

Toilet နှင့် To let (၂)



မင်းကွန်းက ကလေးလေးတစ်ယောက် သင်ပေးခဲ့တဲ့
အိမ်သာရဲ့ မီးနင်းလေးက အရမ်းအသုံးဝင်ပါတယ်။ ဘယ်နိုင်ငံကိုဘဲ သွားသွား အိမ်သာသွားချင်လို့ရှိရင် Toilet ဆိုတဲ့ စာလုံးလေးဘဲ လိုက်ရှာရုံဘဲပေါ့။
စူပါမားကက်တွေကို သွားဦးမလား။ လမ်းညွန်က အတိအကျဘဲ။ မှားစရာ ဘာအကြောင်းမှ မရှိဘူး။ ဆရာကြီးစတိုင်ဖမ်းပြီး သွားလို့ရတယ်။

တစ်နေ့
ကျနော့်သူငယ်ချင်းနှစ်ယောက်နှင့်အတူ ကွန်ပျူတာပစ္စည်းတစ်ခုဝယ်ဖို့ ကျနော်တို့အိမ်ကနေ Hounslow High Street မှာရှိတဲ့ Currys ဆိုင်ကို သွားကြတယ်။ Currys ဆိုပြီး ဟင်းတွေရောင်းတယ်လို့တော့ မထင်လိုက်ကြနဲ့ဦးနော်။ အိမ်အသုံးအဆောင်ပစ္စည်းတွေ ရောင်းတဲ့ဆိုင်ပါ။ ဥပမာ ရေခဲသေတ္တာတို့၊ အ၀တ်လျော်စက်တို့၊ ဖုန်စုပ်စက်တို့ ပေါ့လေ။ ကွန်ပျူတာနှင့်ကွန်ပျူတာပစ္စည်းတွေလဲ ရောင်းပါတယ်။

အဲဒီဆိုင်ကို ကျနော်တို့အိမ်က လမ်းလျောက်သွားရင် မိနစ်လေးဆယ်လောက်ဘဲ လျောက်ရပါတယ်။ ဒါကြောင့် သူငယ်ချင်းသုံးယောက် အတူတူ လမ်းလျောက်ပြီး Shopping ထွက်ခဲ့ကြပါတယ်။ လမ်းများများလျောက်ရင် ဗိုက်ဆာလာမှာစိုးလို့ မသွားခင် ကော်ဖီတစ်ခွက် သောက်သွားခဲ့တယ်။ ၀ယ်သောက်ရရင်မလွယ်ဘူးလေ။ ဈေးအရမ်းကြီးတယ်။ ဒါကြောင့် ကိုယ်တိုင်ဖျော်ပြီး ခပ်များများလေး သောက်သွားခဲ့တာပါ။

လမ်းခုလတ်ရောက်တော့ ကျနော် ဆီးသွားချင်လာတယ်။ ကန်တော့်ပါသေးရဲ့ ။ သွားချင်တာမှ အရမ်းဘဲ။ ချွေးတောင်ပြန်တယ်။ Park တစ်ခုထဲ ဖြတ်သွားရတဲ့အတွက် အဲဒီ Park ထဲမှာဘဲ မြန်မာဆန်ဆန်ကိစ္စဖြေရှင်းရရင်ကောင်းမလားမသိဘူး လို့ စဉ်းစားမိသေးတယ်။ လူက အရမ်းရှင်းနေတာကိုးဗျ။
ဒါပေမဲ့ CCTV နှင့်မိသွားရင် ရှက်စရာကြီးလေ။ အောင့်လက်စနဲ့အောင့်လိုက်တာဘဲ ကောင်းပါတယ်။

အဲဒီ Park ကို ဖြတ်ပြီး မကြာခင်မှာ Hounslow Central မြေအောက်ရထားဘူတာကိုရောက်လာတယ်။ ဘူတာကို ဖြတ်ကျော်ပြီး မကြာခင်မှာ စာလုံးကြီးကြီးနဲ့ရေးထားတဲ့ ဆိုင်းဘုတ်ကြီးကို မြင်လိုက်ရတော့ ကျနော် အတော်လေးဝမ်းသာသွားတယ်။ အဲဒီစာလုံးက To let တဲ့။

လူတွေရဲ့ စိတ်အကြောင်းကို သိတယ်မဟုတ်လား။ အိမ်သာတက်ချင်တဲ့သူက အိမ်သာကိုမြင်ရပြီဆိုရင် ပိုပြီးမအောင့်မအီးနိုင်ဖြစ်တတ်ကြတယ်လေ။ ကျနော်လဲ ဒီအတိုင်းဘဲ။ To let ဆိုတဲ့ စာလုံးကိုလဲ မြင်လိုက်ရော.. ဟာ.. အဆင်ပြေပြီ... မင်းကွန်းက ကလေးတွေ ကျေးဇူးတော်ကြောင့် ငါသိခဲ့ရတဲ့ မီးနင်းလေးဘဲ ဆိုပြီး အပေါ့စွန့်ချင်စိတ်က ပိုများလာတယ်။

အဲဒီ ဆိုင်းဘုတ်အောက်လဲ ရောက်ရော အထဲဝင်ရအောင် ၀င်ပေါက်တံခါးကို ကျနော်အမြန်ရှာဖွေလိုက်တယ်။
ဒါပေမဲ့ မတွေ့ဘူး။ လူလဲ တစ်ယောက်မှ မတွေ့ဘူး။ ဘာဖြစ်လို့ပါလိမ့်။ ထူးဆန်းလိုက်တာ။

ဆိုင်းဘုတ်ကို သေချာဖတ်ကြည့်လိုက်တော့မှ Toilet မဟုတ်ဘဲ To let ဖြစ်နေတာကိုး။
To let ဆိုတာ မြန်မာလိုငှားရန်ရှိသည်ပေါ့ဗျာ။ အိမ် တိုက်ခန်း ဆိုင်ခန်း စားသောက်ဆိုင် စတာတွေကို ကိုယ်က သူများကို ငှားပေးချင်တယ်ဆိုရင် To let လို့ ဆိုင်းဘုတ်ကပ်ထားလိုက်ရုံပါဘဲ။ အားလုံး ငှားရန်ရှိသည် ဆိုတာကို သိပါတယ်။ လန်ဒန်မှာ နေရာအနှံ့အပြား အဲဒီလို ဆိုင်းဘုတ်တွေ တွေ့ရပါတယ်။

ကျနော်က အပေါ့အရမ်းစွန့်ချင်နေတဲ့သူဆိုတော့ To let ကို Toilet နဲ့ မှားပြီး ဖတ်မိတာပေါ့ဗျာ။ ဖြစ်တတ်ပါတယ်။ နွားပျောက် ခလောက်သံကြား လို့ မြန်မာစကားပုံရှိတယ်မဟုတ်လား။
ဒီအကြောင်းကို ဘယ်သူ့ကိုမှ ကျနော်မပြောပြခဲ့ပါဘူး။ ကျနော်နှင့်အတူသွားခဲ့တဲ့ သူငယ်ချင်းနှစ်ယောက်ကိုလဲ မပြောပြလိုက်ပါဘူး။ ကျနော့်ဘာသာဘဲ ကြိတ်မှိတ်ပြီး နေလိုက်ရတယ်။

ငါးမိနစ်လောက် ထပ်ပြီးလမ်းလျောက်သွားလိုက်တဲ့အခါမှာ High Street မှာရှိတဲ့ စူပါမားကက်ကြီးကို ရောက်တယ်။ ကျနော့်အခက်အခဲကို သူငယ်ချင်းတွေကို ပြောပြလိုက်တယ်။ အဲဒီ စူပါမားကက်ထဲမှာ တစ်ပတ်လောက် လျောက်လည်ပြီး ဈေးဝယ်... အဲ.. ဟုတ်ပါဘူး.. အိမ်သာရှာကြတော့တာပေါ့ဗျာ။
ဒီတစ်ခါတော့ မမှားတော့ပါဘူး။ Toilet လို့ရေးထားတဲ့ နေရာမှန်ကို တိတိကျကျရောက်ရှိခဲ့ပါတယ်။ အဲဒီမှာဘဲ ကျနော့်အခက်အခဲကို ဖြေရှင်းခဲ့ရပါတော့တယ်။

နောက်တစ်လလောက်ကြာတဲ့အခါ သူငယ်ချင်းတစ်ယောက်နဲ့ လမ်းလျောက်ရင်း To let ဆိုတဲ့ ဆိုင်းဘုတ်ကြီးကို လမ်းဘေးတစ်နေရာမှာ ကြော်ငြာထားတာကို တွေ့ရပြန်တယ်။ အဲဒီဆိုင်းဘုတ်ကြီးကို ကြည့်ပြီး သူငယ်ချင်းကပြောတယ်။

"To let ဆိုတဲ့ စကားလုံးကြားထဲမှာ i ထည့်လိုက်ရင် Toilet လို့ ဖြစ်သွားရော"

အဲဒီစကားကိုကြားပြီး ကျနော်ဝမ်းသာသွားတယ်။ ဘာဖြစ်လို့လဲဆိုတော့ ဒီစာလုံးကို ကျနော်တစ်ယောက်ထဲ မှားခဲ့တာမဖြစ်နိုင်ဘူး၊ လူတိုင်းမှားခဲ့နိုင်တယ်ဆိုတဲ့ အသိဝင်လာလို့ပါဘဲ။ ရသေ့စိတ်ဖြေပေါ့ဗျာ။

မိတ်ဆွေတို့လဲ ကျနော့်လို အရေးကြီးတဲ့ကိစ္စတွေမှာ အမှားမဖြစ်ရလေအောင် Toilet နှင့် Tolet ကို မျက်စိမမှားကြစေဖို့ ကျနော် ကိုယ့်ပေါင်ကိုယ်လှန်ထောင်းပြီး တင်ပြပေးလိုက်ခြင်းဘဲ ဖြစ်ပါတယ်။
"ဒီလောက်အတဲ့ကောင် ခံလိုက်ပေါ့ဟ" လို့ ပြောမယ်ဆိုရင်လဲ ကျေနပ်စွာ ခပ်ပြုံးပြုံးဘဲ "ဟဲ ဟဲ ဟဲ" လို့ ရယ်မောရင်း အပြုံးနဲ့ဘဲ တုန့်ပြန်လိုက်ပါရစေ။

No comments: