Monday 8 December 2008

အိပ်မက် (၈)

အိပ်မက်လေးပါးထဲက
ဓါတုက္ခောဘအိပ်မက် (ဓါတ်ခြောက်ခြားလို့မက်တဲ့အိပ်မက်)၊ အနုဘူတပုဗ္ဗအိပ်မက် (ဖြစ်ခဲ့ပြီးတာ စိတ်ကူးတာကို ပြန်မက်တဲ့အိပ်မက်)၊ ဒေ၀တောပသံဟာရအိပ်မက် (နတ်မက်ပေးတဲ့ အိပ်မက်) တို့ကို ကျနော်နားလည်သလောက်ထုတ်နှုတ်ဖော်ပြခဲ့ပြီးပါပြီး။ အခု နောက်ဆုံး အိပ်မက်ဖြစ်တဲ့ ပုဗ္ဗနိမိတ္တအိပ်မက် (တကယ်ဖြစ်လာမဲ့အရာကို နိမိတ်အနေနဲ့ မက်တဲ့အိပ်မက်) အကြောင်းကို ဖော်ပြပေးပါ့မယ်။

ပုဗ္ဗနိမိတ္တအိပ်မက်ဟာ အိပ်မက်ရှင်ရဲ့  ကောင်းမှုကံ မကောင်းမှုကံတို့နှင့် တိုက်ရိုက်သက်ဆိုင်ပါတယ်။ အိပ်မက်နိမိတ်အရ တကယ်ဧကန်စင်စစ် ဖြစ်ပေါ်လာမှာ သေချာပေမဲ့ အကျိုးရှိတဲ့အိပ်မက်လဲဖြစ်နိုင်တယ်။ အကျိုးမဲ့တဲ့ အိပ်မက်လဲ ဖြစ်နိုင်တယ်။ အကုသိုလ်ကံအားကြီးခိုက်မှာ မကောင်းတဲ့အိပ်မက်တွေကို နိမိတ်အနေနဲ့ မြင်မက်တတ်သလို ကုသိုလ်ကံအားကြီးခိုက်မှာ ကောင်းတဲ့အိပ်မက်ကို
ရှေ့ ပြေးနိမိတ်အနေနဲ့မြင်မက်တတ်ကြပါတယ်။။

ဥပမာအားဖြင့်
သွေးတွေကို မြင်မက်တယ် ဆိုကြပါစို့။ မြင်မက်တယ်ဆိုတဲ့နေရာမှာလဲ ဓါတ်ခြောက်ခြားလို့မြင်မက်တာလဲ မဖြစ်ရဘူး။ ရှေ့ ကမြင်ခဲ့ဖူးတဲ့ အာရုံတွေကိုပြန်မက်တာလဲ မဟုတ်ရဘူး။ နတ်တွေဆောင်ပေးလို့မက်တာမျိုးလဲ မဟုတ်ရဘူးနော်။ သူ့အလိုလို မြင်မက်တာကို ပြောတာပါ။ အဲဒီလို သွေးချောင်းစီးနေတာကို မြင်မက်ရင် စစ်မက်ဖြစ်ပွါးတတ်တယ်။ ခိုက်ရန်ဒေါသဖြစ်တတ်တယ်။ ထိခိုက်ဒဏ်ရာရတတ်တယ်။ ကိုယ်တိုင်မဟုတ်ရင် ကိုယ်နှင့်နီးစပ်ရာတွေမှာ ဖြစ်တတ်တယ်။ အဲဒါ ပုဗ္ဗနိမိတ္တအိပ်မက်ရဲ့ သဘောပါဘဲ။

လက်နှစ်ဖက် အဖြတ်ခံရတယ်၊ မျက်လုံးနှစ်လုံး အဖောက်ခံရတယ်၊ နှလုံးအထုတ်ခံရတယ်လို့ မြင်မက်ရင် သေချာပါတယ်၊ သားသမီး မြေး မြစ် တွေထဲက ကျန်းမာရေး အလွန်ညံ့ပြီး သေလုမျောပါး (သို့) သေဆုံးမှု ဖြစ်တတ်တယ် (သို့) ဖြစ်နေပြီ။ ဒီလို အိပ်မက်ဆိုးတွေမျိုး အများကြီးပါဘဲ။
အတိတ်က မကောင်းတဲ့ ကံကြောင့်လဲ မြင်မက်တတ်တယ်။ အခုပစ္စုပ္ပန်တည့်တည့်က မကောင်းတဲ့ ကံကြောင့်လဲ မြင်မက်တတ်ပါတယ်။

အိမ်တစ်အိမ်မှာနှစ်ယောက်ထဲရှိရင် ပိုပြီးကုသိုလ်ကံအထုံအားနည်းတဲ့သူက ပုဗ္ဗနိမိတ်အိပ်မက်ဆိုးကို မြင်မက်တတ်ပါတယ်။ ဝေဿန္တရာဇာတ်တော်ထဲက မဒ္ဒီမိဖုရားကြီးမက်တဲ့ အိပ်မက်ဟာလဲ ဒီသဘောပါဘဲ။
ဝေဿန္တရာမင်းကြီးရဲ့ ကုသိုလ်ကံက မဒ္ဒီမိဖုရားထက် ပိုမြင့်မြတ်တဲ့အတွက် အိပ်မက်ဆိုးကို မဒ္ဒီမိဖုရားက မက်ရတဲ့ သဘောပါ။

မဒ္ဒီမိဖုရားက အိပ်မက် ဒီလိုမက်တယ်။
ဝတ်ရုံအနက်ရောင်နှင့်လူကြီးတစ်ယောက် ဓါးကိုင်ပြီး အိမ်ထဲဝင်လာတယ်။ သူဆံပင်ကိုဆွဲကိုင်ပြီး သူ့ကို မြေကြီးမှာ ဒရွတ်တိုက်ဆွဲသွားတယ်။ သူ့မျက်လုံးနှစ်လုံး ဖောက်ထုတ်ခံရတယ်။ သူ့လက်ရုံးနှစ်ဖက် အဖြတ်ခံရတယ်။ သူ့ အသဲနှလုံး ဆွဲထုတ်ခံရတယ်။

မနက်မိုးလင်းတဲ့အခါ ဝေဿန္တရာမင်းကြီးကို မေးလျောက်ကြည့်လိုက်တော့ အိပ်မက်ဟာ အိပ်မက်ပါဘဲ၊ ဘာမှ မစိုးရိမ်ပါနဲ့ လို့ ပြန်ပြောခဲ့တယ်။ တကယ်ဆို အိပ်မက်ကို ဖတ်တတ်တဲ့နေရာမှာ ဝေဿန္တရာမင်းကြီးကို ဘယ်သူမှ လိုက်မမီဘူး။ မဒ္ဒီမိဖုရားစိတ်ချမ်းသာအောင်ပြောလိုက်ပေမဲ့လဲ ဝေဿန္တရာမင်းကြီးကိုယ်တိုင်ကတော့ မကြာခင် သားတော်နှင့်သမီးတော်ကို အလှူခံမဲ့လူ ရောက်လာတော့မယ်ဆိုတာ သဘောပေါက်တယ်။

တကယ်လဲ ဇူဇကာပုဏ္ဏားကြီးထံ ဇာလီနှင့်ကဏှာဇိန် (သားတော်နှင့်သမီးတော်) တို့ကို လှူလိုက်ရပါတယ်။
ဝေဿန္တရာမင်းကြီးက ပုတ္တပရိစ္စာဂလို့ခေါ်တဲ့ သားတော်သမီးတော်တို့ကို စွန့်လွတ်လှူဒါန်းပြီး ဒါနပါရမီပြည့်စုံသွားပြီဆိုပြီး ၀မ်းမြောက်နေတယ်။ ဒါပေမဲ့ မဒ္ဒီမိဖုရားခမျာမှာတော့ အရူးတစ်ပိုင်းဖြစ်လို့။

အဲဒါ ပုဗ္ဗနိမိတ္တအိပ်မက်ဆိုးဘဲပေါ့။ နိမိတ်အတိုင်း တကယ်ဖြစ်လာတာဘဲ မဟုတ်လား။

(အိပ်မက် အမှတ် ၉ ဆက်ဖတ်ပါ)

No comments: