မျှော်လင့်ပါ.... သို့သော်

"Hope for the best and prepare for the worst"
"အကောင်းဆုံးကို မျှော်လင့်ထားပြီး အဆိုးဆုံးအတွက် ပြင်ဆင်ထားပါ"

ဒီစကားလေးကို ပြောခဲ့တဲ့နိုင်ငံ့ခေါင်းဆောင်တွေ နည်းမှာမဟုတ်ပါဘူး။ ၀င်စတန်ချာချီလဲပြောခဲ့တယ်၊ ဗိုလ်ချုပ်အောင်ဆန်းလဲ ပြောခဲ့တယ်။ ကျနော်မသိတဲ့ သူတွေအများကြီးလဲ ပြောခဲ့ကြမှာပါဘဲ။ ဘယ်သူတွေ ဘယ်လောက်ဘဲပြောပြော ဒီစကားလေးက လုံးဝ ရိုးအီမသွားဘူး။ အမြဲတမ်းလန်းဆန်းတက်ကြွပြီး အင်အားတွေပါဝင်နေတယ်။ အဓိပ္ပါယ်တွေနဲ့ပြည့်နက်နေတယ်။ စကားလုံးအရမ်းလှပတယ်။

လူတိုင်းမှာ မျှော်လင့်ချက်ကိုယ်စီရှိကြစမြဲပါ။ မျှော်လင့်ပျောက်ဆုံးသွားရင် ပဲ့မပါတဲ့လှေလို လေတိုက်ရာ မျှောပါသွားတဲ့ဘ၀မျိုးရောက်သွားမှာပေါ့။ ငုတ်မိသဲကိုင်၊တက်နိုင်ဖျားရောက်။ ငှက်မှန်ရင် ပျံရင်းနဲ့သေ၊ လူမှန်ရင် ကြံရင်းနဲ့သေ စတဲ့ စကားပုံတွေဟာ အားလုံးနှင့် အကျွမ်းဝင်ပြီးသားပါ။ ဒီစကားပုံဟာ လူတွေရဲ့  မျှော်လင့်ချက်ထားရှိပုံကို ဖော်ပြနေတာပါ။

ဒါပေမဲ့ အဓိပ္ပါယ်မဲ့တဲ့ မျှော်လင့်ချက်မျိုးတော့မဖြစ်သင့်ပါဘူး။
ဥပမာအားဖြင့် အနောက်ကနေထွက်၊ အရှေ့ မှာနေ၀င်၊
တောင်ထိပ်မှာ ကြာပေါက်၊ ပိတောက်တွေပြာ၊ တမာတွေချို၊ မိုးပြို၊ မြေအက်၊ ကမ္ဘာပျက်။
ဒီလို မဖြစ်နိုင်တာကို စိတ်ကူးယဉ်ပြီး တမ်းတမှန်းဆနေရင်တော့ လူ့တိရစ္ဆာန်သက်သက်ဘဲပေါ့။
အဓိပ္ပါယ်ရှိပြီး ဖြစ်နိုင်ချေရှိတဲ့ မျှော်လင့်ချက်မျိုးဘဲဖြစ်သင့်တယ်။

အုန်းသီးထဲ ရေရှိတာ၊ ပင်လယ်ရေ ငန်တာ၊ ငါးတွေရေကူးနိုင်တာ၊ ငှက်တွေ ပျံသန်းနိုင်တာ.... အဲဒါတွေဟာ အထူးအဆန်းလဲမဟုတ်ဘူး။ ငါလဲ သူတို့လိုဖြစ်ချင်လိုက်တာလို့ မျှော်လင့်စရာလဲ မလိုဘူး။ ပြီးတော့ အားကျစရာလဲ မဟုတ်ဘူး။ သတ္တ၀ါတိုင်းမှာ ကျွမ်းကျင်ရာ လိမ္မာရာ ရှိကြတာဘဲမဟုတ်လား။

Targetကို တိတိကျကျထားရှိပါ။
အဲဒီ Target ပေါ်မှာဘဲ မျှော်လင့်ချက်ကိုထားရှိပါ။
ထားရှိတဲ့ မျှော်လင့်ချက်ကို အဆက်မပြတ်ပါစေနဲ့။
မျှော်လင့်ချက်အတိုင်း အကောင်အထည်ဖော်ဖို့ ကြိုးစားပါ။
ဒီ Theory လေးကို နားလည်ပါ= (Target>continuous intention>strenuous effort>Success)
တစ်လ... တစ်နှစ်... ဆယ်နှစ် ကြာရင်ကြာမယ်။ စိတ်ဓါတ်မကျပါနဲ့။
ရည်မှန်းချက်ရှိရှိကြိုးစားတဲ့သူတွေအတွက် အောင်မြင်မှုတွေက လက်ကမ်းကြိုးဆိုနေမှာ သေချာပါတယ်။

ဖိုးလမင်းကြီးရေ... ထမင်းဆီဆမ်း ရွှေလင်ဗန်းနဲ့ပေးပါ ဆိုတဲ့...... ကလေးမျှော်လင့်ချက်မျိုးမထားသင့်ပါဘူး။
တနေ့ကျရင် ဆရာဝန်ကြီးဖြစ်ကိုဖြစ်ရမယ်၊ အင်ဂျင်နီယာကြီးဖြစ်ကိုဖြစ်ရမယ်ဆိုတဲ့ မျှော်လင့်ချက်မျိုးဘဲထားသင့်တယ်။

သောမတ်စ် အက်ဒီဆင် အခါတစ်သောင်းတိတိ စမ်းသပ်မှုမအောင်မြင်ဘူး။ ဒါပေမဲ့သူစိတ်ဓါတ်မကျခဲ့ပါဘူး။
တစ်သောင်းနှင့်တစ်ကြိမ်မြောက်မှာ သူ့စမ်းသပ်မှုအောင်မြင်သွားတယ်။ သူ့မျှော်လင့်ချက်ကြီးမှုကြောင့် ကျနော်တို့ လျပ်စစ်မီးတွေ အသုံးပြုနိုင်တာပါ။ သူ့ကို လူတချို့ က ဆရာ.. ဆရာ့ စမ်းသပ်မှုတွေ အခါတစ်သောင်းအထိ မအောင်မြင်ခဲ့ဖူးဆို လို့ မေးကြတယ်။
သူပြန်ဖြေတဲ့ စကားလေးက အရမ်းမှတ်သားစရာကောင်းတယ် --
"ငါ အခါ ၁၀၀၀၀ တိတိ မအောင်မြင်ခဲ့တာ မဟုတ်ဘူး၊ ဒီလိုလုပ်ရင် လျပ်စစ်မီးမရဘူးဆိုတဲ့ Theory ပေါင်း ၁၀၀၀၀ တိတိကို အောင်မြင်စွာသိရှိခဲ့တာပါ" တဲ့။

မျှော်လင့်ချက်ကို ခိုင်ခိုင်မာမာ ထားရမယ်။
သို့သော်...
စစ်မှန်တိကျတဲ့ မျှော်လင့်ချက်မျိုးဘဲ ဖြစ်သင့်ကြောင်းပါ။ ။