ဒီနေ့ အင်္ဂလန်ရဲ့ နာရီတွေ အိပ်ဆေးမိသွားသလားမသိဘူး။ တစ်နာရီနောက်ကျနေတယ်။ ကျနော့်အိမ်က နာရီတစ်လုံးထဲ နောက်ကျနေတာမဟုတ်ပါဘူး။ အင်္ဂလန်တစ်နိုင်ငံလုံးမှာရှိတဲ့နာရီတွေအားလုံး တစ်နာရီတိတိကို နောက်ကျနေတာ။ မနေ့က ဒီအချိန်ဆို မနက်ကိုးရှစ်နာရီ။ ဒါပေမဲ့ ဒီနေ့ ရှစ်နာရီဘဲ ရှိသေးတယ်။
နေ့စဉ်ထုတ်သတင်းစာလေးတစ်စောင်ကောက်ဖတ်လိုက်တော့မှ...... အော်... အော်.. ဂလိုလားလို့ သဘောပေါက်လိုက်တယ်။ Daylight saving time (တစ်နာရီတိုးထားတာ) ကို ဆောင်းရောက်ခါနီးရင် ဒီနိုင်ငံမှာ ဒီလိုဘဲ နှစ်စဉ် တစ်နာရီနောက်ဆုတ်နေကျဆိုဘဲ။
......................
Daylight saving timeတွေ ဘာတွေတော့ နားမလည်ဘူး။ ကျနော်မြန်မာမှာရှိစဉ်က ဆရာတစ်ယောက်ပြောဖူးတာကို အမှတ်ရမိတယ်။ အင်္ဂလန်ရဲ့ စံတော်ချိန်နာရီကို သိချင်ရင် မြန်မာနာရီကို ဇောက်ထိုးဆွဲထားလိုက်။ အဲဒါ အင်္ဂလန်စံတော်ချိန်ဘဲ တဲ့။ မှန်လိုက်တာဗျာ။ ကျနော် ဒီနေ့စောစောစီးစီး သေချာ စမ်းသပ်ကြည့်လိုက်တယ်။ ကွတ်တိဘဲ။ ဒီမှာက မနက်ရှစ်နာရီ။ မြန်မာမှာက နေ့လည် ၂နာရီခွဲ။
Daylight saving time သမိုင်းအကြောင်းလေး နဲနဲတင်ပြပေးပါ့မယ်။ အဲဒီ စိတ်ကူးကို ၁၇၈၄ ခုနှစ်ကတည်းက ဘင်ဂျန်မင် ဖရင်ကလင် ဆိုတဲ့သူက စတင်အကြံပြုခဲ့တာပါ။ ဒါပေမဲ့ ဘယ်သူမှ စိတ်မ၀င်စားခဲ့ကြပါဘူး။ နောက်နှစ်ပေါင်း ၁၀၀ကျော်အထိဘယ်နိုင်ငံကမှ အကောင်အထည်မဖော်ဖြစ်ခဲ့ကြပါဘူး။
ယူကေမှာတော့ ၁၉၀၈ ခုနှစ်မှာ Daylight saving time ကို အသုံးပြုဖို့ လွတ်တော်ကို တင်သွင်းခဲ့ပါတယ်။ ဒါပေမဲ့ ကန့်ကွက်မဲများတဲ့အတွက် အထမမြောက်ခဲ့ပါဘူး။
၁၉၁၆ခု၊ ပထမကမ္ဘာစစ်အတွင်းမှာဘဲ ဂျာမနီနိုင်ငံက စပြီး Daylight saving timeကို အသုံးပြုခဲ့ပါတယ်။ သြစတီးရီးယား ဒိန်းမတ် ပြင်သစ် ပေါ်တူဂီ အီတလီ နော်ဝေ ဆွီဒင်စတဲ့ နိုင်ငံတွေလဲ လက်ခံလာကြပါတယ်။ အဲဒီနှစ်မှာဘဲ လျပ်စစ်ပါဝါချွေတာဖို့ စစ်ရေးလှုပ်ရှားမှုတွေအတွက် အထောက်အကူဖြစ်စေဖို့ဆိုတဲ့ ရည်ရွယ်ချက်နှင့် ယူကေမှာ Daylight saving time ကို အသုံးပြုလာပါတယ်။ အားလုံးလက်ခံလာတဲ့အတွက် အဲဒီနှစ်က စတင်ပြီး အခုထိ ယူကေမှာ အဲဒီစနစ်ကို သုံးစွဲလျက်ပါဘဲ။
Daylight saving timeဆိုတာ လက်ရှိနာရီကို တစ်နာရီထပ်တိုးလိုက်တာပါ။ နေရောင်ခြည်ပိုမြင်ရဖို့ဆိုတဲ့ရည်ရွယ်ချက်ပေါ့။ မနက်ပိုင်းမှာ လူတွေဟာ နေထွက်တဲ့အထိ အိပ်ရာထဲမှာ ရှိသေးတဲ့အတွက် မိုးစောစောလင်းရင်လဲ အိပ်မြဲအိပ်လျက်ဖြစ်နေမှာ သေချာပါတယ်။
ဥပမာ.. အရင်က မနက်ခုနစ်နာရီဆိုရင် အခု ရှစ်နာရီ။ ညနေပိုင်းကိုလဲ နေက နောက်ကျမှဝင်မယ်။ ဒါဆို လျပ်စစ်သုံးစွဲမှုတွေ အထိုက်အလျောက်လျော့ကျသွားနိုင်ပါတယ်။
ယူကေမှာ ၁၉၆၈ ကနေ ၁၉၇၁ အထိ တစ်နှစ်လုံး တစ်နာရီတိုးပြီး(၄ နှစ်လုံးလုံး) အဲဒီစနစ်ကို အသုံးပြုခဲ့တယ်။ ၁၉၇၂မှာ လူကြိုက်နည်းလာတဲ့အတွက် တစ်နှစ်လုံးအစား ၆လလောက်စီဘဲ တစ်နာရီတိုးလိုက် တစ်နာရီဆုတ်လိုက်နဲ့ ကျင့်သုံးခဲ့ကြတာ အခုအထိပါဘဲ။
Daylight saving time ကို အသုံးပြုနေတဲ့ကာလတစ်လျောက် လန်ဒန်မှာ မနက်လေးနာရီကျော်ရင်နေထွက်ပြီး ည ၁၀နာရီလောက်မှ နေ၀င်တယ်။ Daylight saving timeကို အသုံးမပြုတဲ့ကာလတွေမှာတော့ ညနေ ၄နာရီကျော်မှာ နေ၀င်ပြီး မနက် ရှစ်နာရီလောက်မှ နေထွက်တယ်။
လွန်ခဲ့တဲ့မတ်လ ၃၀ ရက်နေ့ကစပြီး တစ်နာရီရှေ့ တိုးလိုက်တယ်။ ဒီနှစ်အတွက် Daylight saving time စပြီပေါ့။ မြန်မာနိုင်ငံမှာ မကြုံဖူးခဲ့တော့ အရမ်းအံ့သြမိတယ်။ နေ့အချိန်တွေပိုရှည်လာတယ်။ အဲဒီအချိန်တုန်းက မြန်မာပြည်နဲ့ ၅ နာရီခွဲဘဲ အချိန်ကွာခြားတယ်။ ဒါကြောင့်မို့ အင်္ဂလန်ကနာရီကို အထက်အောက်ပြောင်းပြန်လှန်ပြီးကြည့်ရင် မြန်မာအချိန်နှင့်မကိုက်ဘူး။
အခု ဒီနေ့ (၂၆၊၁၀၊၀၈)ကစပြီး Daylight saving time အတွက် တိုးခဲ့တဲ့ တစ်နာရီကို နောက်ဆုတ်လိုက်တယ်။ ဒါကြောင့် အခုဆိုရင်
အင်္ဂလန်နှင့်မြန်မာ ၆ နာရီခွဲကွာသွားပါပြီ။ ဒီအချိန်မှာတော့ အင်္ဂလန်ကနာရီကို ဇောက်ထိုးဆွဲပြီးကြည့်လိုက်ရင် မြန်မာမှာရှိနေတဲ့ လက်ရှိအချိန်နှင့်ကွက်တိဘဲ။ နှိုင်းယှဉ်ထားတဲ့ပုံကို တင်ပေးလိုက်ပါတယ်။
မိတ်ဆွေကိုယ်တိုင်လဲ စမ်းကြည့်ပေါ့။ မိတ်ဆွေရဲ့ ဘယ်နာရီကိုမဆို ပုံထဲပါတဲ့အတိုင်း လုပ်ကြည့်လိုက်ရင် သဘောပေါက်မယ်ထင်ပါတယ်။
အင်္ဂလန်မှာ မနက် ၈ နာရီဆိုရင် မြန်မာမှာ နေ့လည် ၂ နာရီခွဲ။
ဒါကြောင့်... အင်္ဂလန်ကနာရီတွေ အိပ်ဆေးအသောက်လွန်ပြီး အိပ်စက်နေကြတာ မဟုတ်ကြောင်းပါခင်များ။
No comments:
Post a Comment