Friday 31 October 2008

အအေးမီး နှင့် အပူမီး

သီတတေဇော ဥဏှတေဇော
တရားသဘော တီးခေါက်ကြည့်တော့
အအေးမီး အပူမီးတဲ့။
......................

ဆီမီး လျပ်စစ်မီး ဂက်စ်မီး ပါစကမီး
မီးအားလုံး အပူ
ယူတတ်ရင် ဗဟုသုတရတယ်။

တောမီးတောင်မီး
တဟီးဟီးလောင်ကျွမ်း
တောတောင်အ၀ှမ်းမီးသွေးဖြစ်။

မီးဖိုချောင်ကြည့်ဦးမလား
မီးသွေးပြာပူ
ရေတွေဆူနေတာ ဥဏှရဲ့ သတ္တိကြောင့်။

နေပူပူကို ခံစားရင်း
အရေထူထူဖြစ်အောင် လောင်ကျွမ်း
အဲဒါလဲ ဥဏှရဲ့ အစွမ်းတွေဘဲပေါ့။
.......................

သီတဓါတ်သဘောကိုလိုက်ရှာရင်း
အမောဆိုက်ခဲ့ပေါင်းမနည်းဘူး။

ဆောင်းချမ်းချမ်းမနက်ခင်းမှာ
ချောင်းတစ်ဖက်ကမ်းလက်ပစ်ကူးလဲ
ထူးသလိုရှိခဲ့ပေမဲ့
တွေ့ပါဘူး သီတမီး။

ချမ်းရင်ရေချိုး နှင်းတောတိုး
ဆိုရိုးစကား မှတ်သားစရာကောင်းပေမဲ့
ထပ်သွားစရာမလို
ပြတ်သားစွာသိခဲ့ရတာက အအေးမီးနတ္ထိ။

အေးနေတဲ့ ရေခဲတစ်ချောင်း
လက်ချောင်းလေးတွေပေါ်တင်
အအေးလောင်ကျွမ်းမယ်ထင်သလား
လားလားမှမရှိ နတ္ထိပါဘဲလေ။
...................................

အနောက်တိုင်းဒေသ ခဏလေးရောက်ခါရှိသေး
အေးလိုက်တဲ့အဖြစ်
စိတ်တော်တော်ညစ်သွားတယ်။

မြောက်ဝင်ရိုးစွန်းထုထည်
ရေခဲကြိုက်တဲ့သူတွေအတွက်
အကိုက်ဘဲဖြစ်သွားလိမ့်မယ်။

ဝင်ရိုးစွန်းဖြတ်တိုက်တဲ့ လေမိုက်ရူးရဲတွေကြောင့်
ဒေသတစ်ဝိုက်ကလူတွေ
အတော်လေး အကြပ်ရိုက်သွားကြတယ်။

လူတစ်ယောက်အကြောင်းပြောပြမယ်
သူ့ရဲ့ လက်ချောင်းခြေချောင်း နှာခေါင်းမကျန်
တွန်းလှန်မြစ်ပြုတ် တဖုတ်ဖုတ်မြေသို့ကျ
သီတအစွမ်းတဲ့လေ။

သစ်ပင်သစ်ရွက် သစ်ခက်တွေကိုကြည့်မလား
ရွက်ရှိဘ၀မှ ရွက်မဲ့ဘ၀ကိုပြောင်း
ဆောင်းရောက်ရင် အ၀တ်အထည်မရှိ
မိမွေးတိုင်း ဖမွေးတိုင်းဖြစ်နေကြ
သီတကချွေချသတဲ့လေ။
.......................................

အပူမီး အအေးမီး
ဒီနည်းနှင့်ကျနော်သဘောပေါက်
တစ်ယောက်ယောက်က ကန့် ကွက်လိမ့်မလား။

အမှားတွေ့ ရင်ထောက်ပြ
အမှန်ရအောင်ကူညီသူကို
ကျနော် ကြည်ဖြူနေမှာပါလေ။

No comments: